रुकुम पश्चिम -२६, फागुन ।

रुकुम पश्चिमको बाँफिकोट गाउँपालिका वडानम्बर -३, का दुई किशोरीको शव सानीभेरी नदीमा फेला परेको छ । जिल्ला प्रहरी कार्यालयका सूचना अधिकारी हरिप्रसाद पुनका अनुसार आज बिहान दुई किशोरीको शव सानीभेरी नदीमा फेला परेको हो ।

प्रहरीका अनुसार मृत अवस्थामा फेला परेको शव बाँफिकोट गाउँपालिका -३, की १४ वर्षीया कल्पना ओली र १२ वर्षीया उर्मिला ओलीको रहेको छ । सोमबार बेलुकी मुसिकोट नगरपालिकाको छिङ स्थित बिहेमा सहभागी भएर घर फर्किँदै गरेका दुई किशोरी मृत अवस्थामा भेटिएका हुन् ।

१२ वर्षीया सपना ओली भने बेपत्ता भएको प्रहरीले बताएको छ । उनीहरूले सानी भेरी नदी तर्दै गर्दा बगेको हुन सक्ने आशंका गरिएको छ । घटनाको थप अनुसन्धान भइरहेको प्रहरीले बताएको छ ।