काठमाडौँ, -२५, भदौ
देशभर सुरक्षा निकाय परिचालन भएपछि विध्वंसात्मक गतिविधिमा संलग्न २७ जना पक्राउ परेका छन् । नेपाली सेना , नेपाल प्रहरी लगायत अन्य सुरक्षा निकायहरु परिचालन भएपश्चात् भाद्र २४ गते राति १० बजेदेखि भाद्र २५ गते बिहान १० बजेसम्म काठमाडौँसहित देशका विभिन्न स्थानमा लुटपाट, आगजनी र अराजक गतिविधिमा संलग्न व्यक्तिहरु पक्राउ परेका हुन् ।
सुरक्षा निकायका अनुसार काठमाडौँको गौशाला–चाबहिल–बौद्ध क्षेत्रबाट लुटपाटमा संलग्न व्यक्तिहरुबाट रु. ३३ लाख ७० हजार नगद बरामद गरिएको छ । यस्तै, काठमाडौँका विभिन्न स्थान र पोखराबाट गरी ३१ नाल विभिन्न किसिमका हतियार, म्यागजिन तथा गोलीगठ्ठा पनि बरामद भएको बताइएको छ ।
आगजनी नियन्त्रणका लागि ३ वटा बारुण यन्त्र परिचालन गरिएको छ भने झडपमा परी २३ जना नेपाल प्रहरी र ३ जना सर्वसाधारण घाइते भएका छन् । उनीहरुको सैनिक अस्पतालमा उपचार भइरहेको छ ।
सुरक्षा निकायले परिस्थितिलाई नियन्त्रणमा ल्याईसकेको र आवश्यक कानुनी प्रक्रिया अघि बढाइने जनाएको छ ।
