रुकुम पश्चिम -६, भदौ ।

आज बिहान करिब ६ बजे मुसिकोट नगरपालिका -१०, माथिल्लो चौरबाट आएको पहिरोले तल्लो चौरस्थित गणेश ओलीको घर पूर्णरूपमा क्षति पुर्‍याएको छ । घरभित्र रहेका पशु, खाद्यान्न, लत्ता-कपडा लगायत सम्पूर्ण सामान पहिरोले पुरेको वडाध्यक्ष बसन्त खड्काले जानकारी दिए ।

सोही ठाउँका उमेश ओलीको घर पनि बस्न नमिल्ने गरी क्षतिग्रस्त भएको छ । त्यस्तै, शेरबहादुर ओली र लालबहादुर ओलीका घरमा पनि क्षति पुगेको छ ।

खड्काका अनुसार माथिल्लो चौरका धेरै क्षेत्रमा धाँजा फाटिसकेको र थप पहिरो आउन सक्ने जोखिम रहेकाले तल्लो चौरका अरु आठ घर उच्च जोखिममा रहेका छन् ।