रुकुम पश्चिम -१५, जेठ ।
रुकुम पश्चिमको सानीभेरी गाउँपालिकाले गणतन्त्र दिवसको अवसरमा विभिन्न कारणले जोखिममा रहेका ३१ जना बालबालिकालाई शैक्षिक सामाग्री बितरण गरेको छ । बिहिबार गणतन्त्र दिवसको अवसरमा आयोजित अन्तरक्रिया कार्यक्रममा उक्त शैक्षिक सामाग्री बितरण गरिएको सानीभेरी गाउँपालिकाका बाल कल्यान अधिकारी मानबिर ओलीले बताए ।
बाबु वा आमाको मृत्यु भएका, अपंगता भएका तथा अति विपन्न पालिका भित्रका ३१ जना बालबालिकालाई प्रति व्यक्ति ४ हजार १ सय ६० बराबरको शैक्षिक सामाग्री बितरण गरिएको छ । बितरण गरिएको सामाग्रीमा १ वटा झोला, ३ दर्जन कापी, २० वटा कलम, ज्यामिती बक्स तथा विद्यालयको ड्रेस रहेको छ ।
१८ औं गणतन्त्र दिवसको अवसरमा सिम्ली बजार तथा नयाँ बजारमा प्रभात फेरी गरेर सिम्लीमा रहेको सहिद स्मृति भवनको हलमा अन्तरकृया कार्यक्रम सम्पन्न भएको छ । राप्ती ज्ञानोदय मावि सिम्ली, सूर्योदय मावि सिम्लीका शिक्षक तथा विद्यार्थीहरु, राजनितिक दलका प्रतिनिधि, कर्मचारी तथा जनप्रतिनिधिको उपस्थितिमा अन्तरकृया सम्पन्न भएको हो ।
कार्यक्रममा गणत्तन्त्र स्थापना, गणतन्त्रका उपलब्धी, महत्व लगायतका विषयमा अन्तरकृया भएको थियो । सानीभेरी गाउँपालिका अध्यक्ष बिर्खबहादुर विष्टको अध्यक्षतामा भएको अन्तरकृयामा विद्यार्थी, शिक्षक, राजनीतिक दलका प्रतिनिधि तथा जनप्रतिनिधिले दिवसको शुभकामना मन्तव्य राखेका थिए । कार्यक्रमको संचालन प्रमुख प्रशासकीय अधिकृत दिपक बुढाथोकीले गर्नुभएको थियो ।
