रुकुम पश्चिम -३, चैत
रुकुम पश्चिमको सानीभेरी गाउँपालिकाले आफ्नो सेवा प्रवाहबारे जानकारी लिन तथा गुनासो गर्न टोल फ्री नम्बर (१८१०५०००१४६) सञ्चालनमा ल्याएको छ । गाउँपालिकाले नागरिकको गुनासो र सुझाव संकलन गरी सेवा प्रवाहमा सुधार गर्ने उद्देश्यसहित टोल फ्री नम्बर सञ्चालनमा ल्याएको हो ।
यस नम्बरमा फोन गर्दा कुनै शुल्क लाग्ने छैन । जसले गर्दा गाउँपालिकाका बासिन्दाले निःशुल्क रूपमा आफ्ना समस्या र सुझाव राख्न सक्नेछन् ।
गाउँपालिकाका गुनासो सुन्ने अधिकारी तथा बालकल्याण अधिकारी मानबिर ओलीले यो नम्बरमा आउने गुनासोलाई सम्बोधन गर्ने जिम्मेवारी पाएका छन् । उनले प्राप्त गुनासोलाई सम्बन्धित निकायसम्म पुर्याउने र समाधानका लागि पहल गर्ने छन् ।
स्थानीय सरकारप्रति जनताको विश्वास बढाउन तथा नागरिकको प्रत्यक्ष सहभागिता सुनिश्चित गर्न सानीभेरी गाउँपालिकाले अघि बढाएको यो कदम सकारात्मक मानिएको छ । गाउँपालिका भित्रका नागरिकका लागि पहिले गुनासो राख्न समस्या भए पनि अब भने गाउँपालिकासँग सिधा सम्पर्क गर्न सहज हुनेछ ।
