रुकुम पश्चिम -११, साउन ।
रुकुम पश्चिमको त्रिवेणी गाउँपालिकाबाट करिब दुई करोडको बुर्नी अदुवा (माउ गानो) निर्यात भएको छ । चालु आर्थिक वर्ष ८३/८४ को सुरुवातमै गाउँपालिका भित्रका अधिकांश किसानले उत्पादन गरेको अदुवा निर्यात भएको हो ।
कृषि शाखाका कृषि अधिकृत रमेश पुन मगरका अनुसार पालिकाबाट एकहजार ७ सय १० क्विन्टल अदुवा बिक्री भएको छ । प्रति क्विन्टल ११ हजारका दरले १ करोड ८५ लाख १० हजारको बुर्नी (माउ गानो) बिक्री गरिएको छ ।
पालिकाको झुल्नेटा र सिम्रुतु सङ्कलन केन्द्रबाट निर्यात गरिएको अदुवा काठमाडौँ र भारत पठाइएको कृषि शाखाले बताएको छ ।
गत वर्षको तुलनामा यस वर्ष अदुवा उत्पादनमा पनि वृद्धि भएको छ । उत्पादन बढ्दा मूल्य पनि बढेको पाइएको छ । पालिकाले गतवर्ष १ करोड ५० लाखको मात्रै अदुवा बिक्री गरेको जनाएको छ । गतवर्ष भन्दा यसवर्ष ३५ लाख बढीको अदुवा निर्यात भएको छ ।
अदुवा पकेट क्षेत्रको रुपमा रहेको यस पालिकाबाट वर्षेनी करोडौँको अदुवा जिल्ला बाहिर निर्यात हुने गरेको छ । जसबाट यहाँका किसानले मनग्य आम्दानी गर्दै आइरहेका छन् ।
चैत वैशाखमा रोपेको अदुवा विशेषगरी साउन भदौ महिनामा बुर्नी (माउ गानो) निकालेर बिक्री गर्ने चलन रहेको छ ।
