रुकुम पश्चिम -१३, जेठ ।
नेपाल पत्रकार महासङ्घले बिहीबार देशैभरका सञ्चार माध्यमलाई सम्पादकीय वा अन्य स्थानमा कालो राख्न आह्वान गरेको छ । महासङ्घको आज बसेको बैठकले निजी तथा सामुदायिक सञ्चारमाध्यमलाई सरकारको निर्णय विरुद्ध कालो राख्न आह्वान गरेको हो ।
प्रधानमन्त्री तथा मन्त्रिपरिषद् कार्यालयले चैत १८ गते सरकारी सञ्चार माध्यमलाई मात्रै सूचना तथा विज्ञापन दिने निर्णय गरेकाले त्यस विरुद्ध महासङ्घले सम्पादकीय वा अन्य स्थानमा कालो राख्ने निर्णय गरेको महासचिव रामप्रसाद दाहालले बताएका छन् ।
सरकारको स्वेच्छाचारी र विभेदकारी निर्णयबाट देशका सबै सामुदायिक तथा निजी सञ्चारमाध्यमको दीगोपन र श्रमजीवी पत्रकारको पेसागत सुरक्षामाथि गम्भीर अवस्था सिर्जना भएकाले उक्त निर्णय खारेजीको माग गर्दै महासंघले चरणवद्ध दबाबमूलक अभियान समेत सञ्चालन गरिरहेको छ ।
वर्तमान सरकारले खर्च कटौतीको बहानामा सबै तहको सरकारी सूचना र विज्ञापन राज्य नियन्त्रित सञ्चारमाध्ममलाई मात्र दिने निर्णय प्रेस स्वतन्त्रता विरुद्ध रहेको महासङ्घको ठम्याई छ ।
प्रेस स्वतन्त्रता नियन्त्रणको अभ्यास स्वरूप पत्रकारलाई निगरानी राख्ने, त्रास सिर्जना गर्ने, समाचार संकलनमा अवरोध गर्ने, श्रमजीवी पत्रकारको श्रम अधिकार सुरक्षा नगर्ने तथा आर्थिक नाकाबन्दी लगाउने कार्य अहिलेको सरकारले गरेको पत्रकार महासङ्घको भनाइ छ ।
