रुकुम पश्चिम -१२, जेठ ।

रुकुम पश्चिमको मुसिकोट नगरपालिका -१२, ले आज वडा कार्यालयमा सार्वजनिक तथा समीक्षा कार्यक्रम सम्पन्न गरेको छ । वडाले आर्थिक वर्ष ८२/८३ मा भए गरेका गतिविधिको एकवर्षीय कार्य प्रगति विवरणको सार्वजनिक तथा समीक्षा कार्यक्रम सम्पन्न गरेको हो ।

सार्वजनिक कार्यक्रममा वडापालिकाले चालु आर्थिक वर्षको अवधिमा वडाको यातायात क्षेत्र देखि प्रशासनिक तर्फका कार्य प्रगति विवरण सार्वजनिक गरेको छ । वडा अध्यक्ष धिरन सिर्पालीले यस आर्थिक वर्षमा वडाका सबै सडक सरसफाई गरिएको, एकसय बढी घरधुरीलाई पुग्ने गरी वडामा खानेपानी निर्माण गरिएको, सिँचाइका लागि नहर र ट्याङ्की निर्माण गरिएको बताए ।

त्यस्तै वडाभित्र रहेका विद्यालयको भवन निर्माण सँगै स्वास्थ्य सेवातर्फ पनि उल्लेख्य काम गरिएको छ । जस अन्तर्गत पाठेघरको मुखको चेकजाँचदेखि नियमित खोप कार्यक्रमलाई कार्य प्रगति विवरणमा समेटिएको छ । एकवर्षको अवधिमा स्वास्थ्य सेवातर्फ करिब २ हजार जतिले सेवा लिएका छन् ।

वडा कार्यालयले विविधतर्फ आश्रम, विद्यालय, मानसिक रोगी, बालबालिका लगायतलाई आर्थिक सहयोग समेत गरेको उक्त कार्य प्रगति विवरणमा समेटेको छ । त्यस्तै प्रशासनिक सेवातर्फ ६० वटा पञ्जीकरणका काम सहित सामाजिक सुरक्षा र सिफारिस तर्फका महत्त्वपूर्ण काम पनि सम्पादित गरिएको छ ।

वडा अध्यक्ष सिर्पालीले प्रस्तुत गरेको कार्य प्रगति विवरण कार्यक्रममा वडाका जनप्रतिनिधि, स्थानीय राजनीतिक दलका प्रतिनिधि, स्थानीय बुद्धिजीवी, पत्रकार लगायतको उपस्थिति रहेको थियो । कार्यक्रमको सञ्चालन वडा सचिव देवीलाल पुनले गरेका थिए ।