रुकुम पश्चिम -२४, चैत ।

अब देखि एउटै विद्यालयमा एकपटक भर्ना भइसकेपछि पटकपटक विद्यार्थी भर्ना शुल्क लिन नपाइने भएको छ । शिक्षा, विज्ञान तथा प्रविधि मन्त्रालयले जारी गरेको सूचनामा एकपटक भर्ना भइसकेको विद्यालयबाट पुनः भर्ना शुल्क लिन नपाइने जानकारी गरिएको छ ।

मन्त्रालयका उपसचिव कृष्णचन्द्र पोखरेलका अनुसार शिक्षा नियमावली २०५९ को परिच्छेद १५ बमोजिम विद्यार्थी भर्ना र शुल्कका विषयमा उक्त सूचना जारी गरिएको छ । नियमावलीमा कुनै पनि विद्यालयले शैक्षिक सत्र सुरु नहुँदै विद्यार्थी भर्ना गर्न नपाइने स्पष्ट व्यवस्था छ ।

तर केही विद्यालयले शैक्षिक सत्र सुरु नहुँदै विद्यार्थी भर्ना गरेको र अग्रिम शुल्क असुल गरेको जनगुनासो बढ्दै गएपछि सर्वोच्च अदालतले नै यस विषयमा फैसलाका गरेको बताइएको छ ।

उक्त फैसला अनुसार शैक्षिक सत्र शुरु नहुँदै भर्ना नगर्ने, नियम विपरीत शुल्क नलिने, अग्रिम शुल्क लिएको भए तत्काल फिर्ता गराउन तथा कानुन विपरीत गएमा त्यस्ता विद्यालयलाई कारबाहीका लागि स्थानीय तहलाई पत्राचार गरिएको छ ।