रुकुम पूर्व -१७, चैत ।
रुकुम पूर्वको सिस्ने गाउँपालिकामा सञ्चालन गरिएको निःशुल्क विशेषज्ञ मानसिक स्वास्थ्य शिविर सफलतापूर्वक आज सम्पन्न भएको छ । सिस्ने गाउँपालिका र भूमे गाउँपालिकाको संयुक्त आयोजना तथा स्वास्थ्य सेवा कार्यालय र जिल्ला अस्पतालको समन्वयमा एक दिने शिविर सञ्चालन भएको हो ।
शिविरबाट १ सय ६ जनाले सेवा लिएको नेपाल जनजागरण मञ्चका अध्यक्ष टेक बहादुर कुसारीले बताए । उनका अनुसार सेवा लिने मध्ये २८ जना पुरुष र ७८ जना महिला रहेका छन् ।
शिविरमा मानसिक स्वास्थ्य जाँच सेवा, मनोसामाजिक परामर्श, निःशुल्क औषधि वितरण तथा सामान्य स्वास्थ्य परीक्षण गरिएको छ । विशेषगरी दिक्क लाग्ने, निराशा महसुस हुने, अत्यधिक रिस उठ्ने, अल्छी लाग्ने, बेचैनी हुने, टाउको वा शरीर दुख्ने, निर्णय लिन कठिनाइ हुने, शरीर झमझमाउने, भविष्यप्रति चिन्ता वा नकारात्मक सोच आउने व्यक्तिको जाँच गरिएको छ ।
त्यस्तै सामाजिक गतिविधिबाट टाढा रहने, केही गर्न नसकिने जस्तो लाग्ने, एक्लै बस्न रुचाउने, खाना मन नलाग्ने, डर लाग्ने तथा हातखुट्टा सिल्का हान्ने जस्ता समस्या भएका व्यक्तिलाई प्राथमिकताका साथ जाँच गरिएको बताइएको छ ।
शिविर सञ्चालनमा नेपाल जनजागरण मञ्च र युएमएन कर्णाली प्रदेश (सुर्खेत क्लस्टर) को आर्थिक तथा प्राविधिक सहयोग रहेको थियो । बाँकी शिविर चैत १८ र १९ गते पुथा उत्तरगंगा गाउँपालिकाको तक क्षेत्रमा सोही प्रकारको मानसिक स्वास्थ्य शिविर सञ्चालन गरिने जनजागरण मञ्चले जनाएको छ ।
