रुकुम पश्चिम -२८, माघ ।
आइसीसी टि२० विश्वकप २०२६ अन्तर्गत भारतको अहमदाबाद क्रिकेट स्टेडियममा आज भएको खेलमा साउथ अफ्रिकाले रोमाञ्चक जित निकालेको छ । दोस्रो सुपर ओभरमा अफगानिस्तानलाई चार रनले पराजित गर्दै साउथ अफ्रिकाले लगातार दोस्रो जित दर्ता गरेको हो ।
जितका लागि २४ रनको लक्ष्य पछ्याएको अफगानिस्तानले १९ रन मात्र बनाउन सक्यो । यस अघि पहिलो सुपर ओभरमा अफगानिस्तानले साउथ अफ्रिकालाई १८ रनको टार्गेट दिएको थियो । जवाफी ब्याटिङमा उत्रिएको साउथ अफ्रिकाले १७ रन बनाएपछि खेल दोस्रो सुपर ओभरमा पुगेको हो ।
सुपर ओभर अघिको खेलमा साउथ अफ्रिकाले २० ओभर खेल्दै १ सय ८७ रन बनाएको थियो । अफगानिस्तानले पनि सोही स्कोर बनाएपछि खेल सुपर ओभरमा जाँदा दोस्रो सुपर ओभरमा साउथ अफ्रिकाले रोमाञ्चक जित निकाल्यो ।
आजको जितसँगै ग्रुप डी मा रहेको साउथ अफ्रिकाले लगातार दुई खेल जित्दा अफगानिस्तानले दुई वटा हार व्यहोरेको छ ।
टि२० विश्वकपमा बिहिबार नेपालले इटालीको सामना गर्नेछ । खेल दिउँसो ३:१५ बजेदेखि सुरु हुनेछ । यसपटकको टि ट्वान्टी विश्वकपमा २० वटा राष्ट्र सम्मिलित छन् ।
