रुकुम पश्चिम, -३० भदौ 

रुकुम पश्चिम आठबिसकोट नगरपालिका –१४ का वृद्धवृद्धाले यस वर्ष सामाजिक सुरक्षा भत्ता परिचयपत्र नवीकरण सेवा सहजै घरमै बसेर पाएका छन् । वडा अध्यक्ष हुकुम पुनको पहलमा वडा सचिव खेमराज पुन र कृषि प्राबिधिक केशव केसीको सक्रियतामा वडा कार्यालयले घर-घरमै पुगेर नवीकरण सेवा उपलब्ध गराएपछि वृद्धवृद्धाले सहजै सेवा पाएका हुन ।

घरमै सेवा पाएपछि वृद्धवृद्धाले पनि खुसी व्यक्त गर्दै वडा कार्यालयप्रति आभार प्रकट गरेका छन् । विशेषगरी शारीरिक असक्तता वा हिँडडुल गर्न कठिनाइ भएका ज्येष्ठ नागरिकलाई लक्षित गरी गरिएको यो पहललाई स्थानीयबासीले समेत निकै सकारात्मक रूपमा लिएका छन् ।

यस प्रकारको अभियानले सरकारी सेवाप्रति विश्वास बढाउने मात्र होइन, सेवाग्राहीलाई हुने खर्च, समय र कठिनाइ समेत कम भएको छ ।

यसअघि वृद्धवृद्धाहरूलाई भत्ता परिचयपत्र नवीकरणका लागि वडा कार्यालय धाउनुपर्ने, लामो लाइन बस्नुपर्ने र कतिपयलाई आफन्त वा नातेदारलाई लिएर आउनुपर्ने बाध्यता थियो । तर, यसपटक वडा कार्यालय आफैं घरघरमा पुगेपछि सेवाग्राहीलाई ठूलो सहजता भएको छ ।

वडा सचिव खेमराज पुनले  वृद्धवृद्धा र असक्त नागरिकलाई सहज वातावरणमा सेवा पुर्‍याउने उदेश्यले यो अभियान संचालन गरिएको  बताएका छन भने यस अभियानलाई आगामी दिनमा पनि निरन्तरता दिने वडा  अध्यक्ष हुकुम पुनको भनाइ छ ।