रुकुम पश्चिम -१२, जेठ ।
नेपाल प्रेस युनियन रुकुम पश्चिम शाखाले आफ्नो ३४ औं स्थापना दिवसको अवसरमा अस्पतालमा उपचाररत विरामीहरुलाई फलफूल वितरण गरेको छ । सोमबार स्वास्थ्य सेवा कार्यालय सल्लेमा उपचाररत ३३ जना र खंलगामा रहेको साझा मुराल अस्पतालमा उपचाररत ७ जना गरी ४० जना विरामीलाई फलफूल वितरण गरिएको नेपाल प्रेस युनियन रुकुम पश्चिमका अध्यक्ष सुमित्रा केसीले जानकारी दिइन् ।
कार्यक्रममा प्रेस युनियनका केन्द्रीय सदस्य प्रबिर ददेलले प्रेस युनियन लोकतान्त्रिक विचारधारामा आधारित संस्था भएको र यसले वाक स्वतन्त्रता तथा पत्रकार सुरक्षाका पक्षमा निरन्तर आवाज उठाउँदै आएको बताए । सो अवसरमा नेपाली कांग्रेस रुकुम पश्चिमका सचिव परमेश्वर भण्डारीले प्रेस युनियनले विभिन्न कालखण्डमा खेलेको भूमिकाको प्रशंसा गर्दै लोकतन्त्र र प्रेस स्वतन्त्रताका लागि संस्थाको योगदान महत्वपूर्ण रहेको उल्लेख गरे ।
कार्यक्रममा नेपाली कांग्रेसका जिल्ला सहसचिव यज्ञबहादुर विष्ट, महाधिवेशन प्रतिनिधि खड्क डाँगी, मुसिकोट नगरपालिका -१ का वडा अध्यक्ष ज्ञानुचन्द्र चन्द, सल्ले अस्पताल विकास समितिका अध्यक्ष टेकबहादुर कुसारी, जिल्ला स्वास्थ्य कार्यालयका प्रमुख डा. जीवन परियार, प्रेस सेन्टरका जिल्ला अध्यक्ष मनिष खड्का, समाजवादी प्रेस संगठनका जिल्ला अध्यक्ष भरत चन्द लगायतको उपस्थिति रहेको थियो ।
नेपाल प्रेस युनियनले हरेक वर्ष सामाजिक उत्तरदायित्व अन्तर्गत विविध कार्यक्रम गर्दै आएको छ ।
