रुकुम पश्चिम -२७, वैशाख ।
आइसीसी क्रिकेट विश्वकप लिग -२ अन्तर्गत स्कटल्याण्ड भ्रमणका लागि नेपाली राष्ट्रिय क्रिकेट टोली घोषणा गरिएको छ । रोहित कुमार पौडेलको कप्तानीमा १५ सदस्यीय अन्तिम टोली आज घोषणा गरिएको हो ।
नवनियुक्त प्रशिक्षक स्टुआर्टले घोषणा गरेको टिममा दीपेन्द्र सिंह ऐरी उपकप्तान रहेका छन् । नेपालको टिममा विकेटकिपरद्वय आसिफ शेख र अनिल कुमार शाह, कुशल भुर्तेल, भिम सार्की र आरिफ शेख रहेका छन् ।
त्यस्तै गुलशन झा, बसीर अहमद, सन्दीप लामिछाने, सोमपाल कामी, करण केसी, नन्दन यादव, रिजन ढकाल र ललित नारायण राजवंशी नेपाली टोलीमा अटाएका छन् ।
लिग-२ अन्तर्गत नेपालले जुन २ र जुन ८ मा स्कटल्याण्ड तथा जुन ४ र जुन १० मा नेदरल्यान्ड्ससँग खेल्दैछ । त्यसअघि नेपालले स्कटल्याण्ड भ्रमणमा स्कटल्याण्ड ए सँग दुई अभ्यास खेल खेल्नेछ ।
क्यानले ब्याटर किरण ठगुन्ना र लोकेश बमसँगै अलराउन्डर रुपेश सिंहलाई भने लिग -२ पछिको टि२०आई सिरिजका लागि टोलीमा राखेको छ ।
