रुकुम पश्चिम -२३, वैशाख ।

रुकुम पश्चिमको मुसिकोटमा सोमबार ५० दिने सिप विकास तालिम समापन गरिएको छ । प्रधानमन्त्री रोजगार कार्यक्रम अन्तर्गत रोजगारमा खटिनु पूर्वको ५० दिने सिप विकास तालिम समापन गरिएको हो ।

“श्रमको सम्मान, राष्ट्रको अभियान” भन्ने मूल उद्देश्यका साथ फागुन अन्तिम साताबाट सुरु गरिएको तालिम एक कार्यक्रमको आयोजना गरी समापन गरिएको मुसिकोट नगरपालिकाले बताएको छ । समापन कार्यक्रममा तालिमका सहभागी ४० जनालाई कार्यक्रमका प्रमुख अतिथि तथा मुसिकोट नगरपालिकाका नगरप्रमुख महेन्द्र केसीले प्रमाणपत्र हस्तान्तरण गर्दै तालिमको सही सदुपयोग गर्न आग्रह गरेका छन् ।

५० दिने तालिममा पलम्बर र सिकर्मीका २०/२० जना प्रशिक्षार्थी सहभागी थिए । सबै सहभागीलाई नगरपालिकाले विभिन्न वडाबाट छनाैट गरेर तालिममा सामेल गराएको हो ।

उक्त तालिम मुसिकोट नगरपालिकाको आर्थिक सहयोग तथा थ्री आर इन्जिनियरिङ कन्सलटेन्सी एण्ड ट्रेनिङ सेन्टर प्रालिको प्राविधिक सहयोगमा सम्पन्न गरिएको बताइएको छ ।

तालिम समापन कार्यक्रममा वडानम्बर -१, का वडाध्यक्ष ज्ञानु चन्द्र चन्दको अध्यक्षता रहेको थियो । प्रमुख प्रशासकीय अधिकृत मोहन प्रकाश गिरी, रोजगार संयोजक मायाँ श्रीवास्तव लगायतको विशेष आतिथ्यता रहेको कार्यक्रमको सञ्चालक रिम बहादुर खड्काले गरेका थिए ।