रुकुम पश्चिम -१५, चैत ।
मुसिकोट खलङ्गामा आज रुकुमेली वाङमय अधिष्ठान गठनको स्थापना दिवस मनाइएको छ । दुई वर्ष अघि ७९ चैतमा स्थापना भएको अधिष्ठान गठनको अवसरमा दोस्रो स्थापना दिवस मनाइएको हो ।
अधिष्ठानका सचिव पूर्ण ओलीका अनुसार अधिष्ठानका अध्यक्ष श्री भूपेन्द्रा मल्लको अध्यक्षतामा रुकुमेली साहित्यकारहरुको उपस्थितिमा स्थापना दिवस मनाइएको छ । उक्त स्थापना दिवसबाट रुकुमेली माटोमा जन्मिएर राष्ट्रिय रूपमा अतुलनीय योगदान पुर्याउनुभएका स्वर्गीय प्रेमप्रकाश मल्लको योगदानको चिर स्मरणको जन्मस्थल सेरीगाउँको मुख्य चोकमा प्रतिमा निर्माणका लागि पहल गर्ने निर्णय गरिएको छ ।
कार्यक्रममा अधिष्ठानका सल्लाहकार भरतकुमार शर्माले अधिष्ठानका गतिविधिहरू सन्तोषजनक रूपमा अगाडि बढेको बताए । त्यस्तै राप्ती साहित्य परिषद् जिल्ला शाखा रुकुम पश्चिमका अध्यक्ष मनलाल ओलीले रुकुमको भाषा, साहित्य, कला र संस्कृतिको उत्थानमा अधिष्ठानले महत्त्वपूर्ण भूमिका निभाउँदै राष्ट्रिय साहित्यमा अमूल्य योगदान दिएकोमा प्रशंशा गरे ।
कार्यक्रममा रुकुमेली वाङमय अधिष्ठानका अध्यक्ष भूपेन्द्रा मल्ले समाजमा बढ्दै गएका विकृति, विसंगति र संकट समाधानको एक मात्र उपाय साहित्य भएको र साहित्यिक क्षेत्रमा अधिष्ठान कटिबद्ध रहेको बताइन् ।
स्थापना दिवस कार्यक्रममा राप्ती साहित्य परिषद् जिल्ला शाखा रुकुम पश्चिमका उपाध्यक्ष एक्कबहादुर केसी, सचिव ओमबहादुर खत्री, सल्लाहकार मुकुन्दप्रसाद शर्मा, इच्छुकप्रष्ठिान प्राज्ञसभा सदस्य खगेश्वर भण्डारीको उपस्थिति रहेको थियो । त्यस्तै रुकुमेली वाङमय अधिष्ठानका सदस्यहरु दीपा ओली शाह, राधा मल्ल, बिना मल्ल, सन्ध्या मल्ल, साहित्य अनुरागी कविता ओली लगायतको आतिथ्यता रहेको बताइएको छ ।
कार्यक्रम सञ्चालन रुकुमेली वाङमय अधिष्ठानका सचिव पूर्ण ओलीले गर्नुभएको थियो ।
समग्र रुकुमको भाषा साहित्य कला संस्कृति तथा सम्पदाको खोज अनुसन्धान र विकासको उद्देश्य राखी रूकुमेली वाङमय अधिष्ठानको विधिवत् स्थापना २०७९ साल चैत १५ गते भएको हो ।
