रुकुम पश्चिम -१५, चैत ।

काठमाडौंमा पूर्वराजावादी समूहद्वारा मच्चाइएको अराजक गतिविधिका क्रममा आज एभिन्यूज टेलिभिजनका क्यामेरा म्यान पत्रकार सुरेश रजकको निधन भएको छ । काठमाडौंको तीनकुनेस्थित एक घरमा पूर्वराजावादी समूहले आगजनी गर्दा रिपोर्टिङमा रहेका पत्रकार रजकको घटनास्थलमै ज्यान गएको हो ।

समाजवादी प्रेस संगठन नेपालले घटनाको घोर भर्त्सना गर्दै प्रेस विज्ञप्ति जारी गरेको छ । संगठनका महासचिव रोहित दाहालद्वारा जारी विज्ञप्तिमा पत्रकारको हत्या तथा सञ्चारगृहहरूमा तोडफोड र आगजनीको निन्दा गरिएको छ । विज्ञप्तिमा भनिएको छ, “शान्तिपूर्ण प्रदर्शनका नाममा सञ्चारमाध्यम, सर्वसाधारण नागरिकका घर, व्यावसायिक भवन, राजनीतिक दलका कार्यालय तथा सरकारी भवनमा गरिएको आक्रमण प्रेस स्वतन्त्रता विरोधी कार्य हो ।”

घटनामा अन्य पत्रकारहरू पनि घाइते भएका छन् । प्रदर्शनकारीको आक्रमणबाट कान्तिपुर टेलिभिजन, रेडियो कान्तिपुर, अन्नपूर्ण पोष्ट दैनिक लगायत सञ्चारमाध्यममा क्षति पुगेको छ । प्रेस संगठनले पत्रकारहरूमाथिको आक्रमण लोकतन्त्रविरोधी कार्य भएको भन्दै दोषीमाथि कडा कारबाही गर्न सरकारसँग माग गरेको छ ।