रुकुम पश्चिम -१७, फागुन ।

रुकुम पश्चिममा जिल्लाव्यापी कविता प्रतियोगिता सहित बृहत स्तरको सिर्जना उत्सव कार्यक्रम गरिने भएको छ । राप्ती साहित्य परिषद् जिल्ला शाखा रुकुम पश्चिमले चैत २२ र २३ गते कविता प्रतियोगिता र सिर्जना उत्सव कार्यक्रम गर्न लागेको हो ।

सदरमुकाम मुसिकोट खलङ्गामा शुक्रबार बसेको परिषद्को बैठकले चैत महिनाभित्रै वार्षिकोत्सव सँगसँगै भव्य साहित्यिक तथा सांस्कृतिक कार्यक्रम आयोजना गर्ने परिषद्का अध्यक्ष मनलाल ओलीले बताए ।

जिल्लाव्यापी कविता प्रतियोगिताका लागि जिल्लाभरबाट चैत १० गतेभित्र प्राप्त भएका कविताहरूमध्ये समितिले उत्कृष्ट २५ कविताहरू छनौट गरी पुनः प्रतिष्पर्धा गराएर सिर्जना उत्सवको दिनमा पुरस्कृत कविताहरू वाचन गरिने बताएको छ । त्यस्तै साँस्कृतिक समितिले सिर्जना उत्सवको दिनमै प्रस्तुत गरिने साँस्कृतिक झाँकीहरूको छनौट र व्यवस्थापन पनि गर्ने भएको छ ।

दुई दिने भव्य सिर्जना उत्सव कार्यक्रममा मूल आयोजक रहेको नेपाली कला साहित्य डटकम प्रतिष्ठानका २० जनाभन्दा बढी साहित्यकारहरू लगायत राप्ती साहित्य परिषदका केन्द्रीय पदाधिकारीहरू र आसपासका जिल्लाका साहित्यकारहरुले पनि भाग लिने भएका छन् ।

यो कार्यक्रमलाई भव्य रूपमा आयोजना गर्न मूल समारोह समितिको काम राप्ती साहित्य परिषद् जिल्ला शाखा रुकुम पश्चिमकै वर्तमान कार्य समितिले लिने भएको छ । त्यस्तै साहित्यकार पूर्ण ओलीको संयोजकत्वमा भरतकुमार शर्मा, खेमराज खड्का, सत्यनारायण श्रेष्ठ, खगेश्वर भण्डारी, महेश केसी सदस्य रहेको आर्थिक स्रोत साधन व्यवस्थापन एवम् प्रचार प्रसार समिति निर्माण गरिएको छ । यसैगरी कविता सङ्कलन तथा छनौट समिति र सांस्कृतिक समितिमा पनि विभिन्न व्यक्तिहरूलाई जिम्मेवारी दिइएको छ ।

मुसिकोट र त्रिवेणीमा आयोजना गरिने कविता प्रतियोगिता र सिर्जना उत्सव कार्यक्रमका लागि मुसिकोट नगरपालिका र त्रिवेणी गाउँपालिकाले प्रारम्भिक बजेट व्यवस्था गर्ने प्रतिबद्धता जनाएको राप्ती साहित्य परिषद् रुकुम पश्चिमले बताएको छ ।