रुकुम पश्चिम – २९, माघ । 

यो बर्षको सफल मानिएको चलचित्र “घरज्वाँई” का निर्माता अनिल बुढाले अर्को चलचित्र निर्माण गर्ने घोषणा गरेका छन् ।  यस अघि दयाहङ राई र मिरुना मगरलाई लिएर “घरज्वाँई” निर्माण गरेका बुढाले  दोस्रो चलचित्र “मितज्यू” निर्माण गर्ने घोषण गरेका हुन् ।

फेसबुकमा उनीले लेखेका छन् “घरज्वाइँ” चलचित्रको संघर्ष अनि सफलता सँगै चलचित्र “मितज्यू” को सहकार्यमा जोडिन पाउँदा म भव्य खुशी छु, यो समय चलचित्र निर्माण गर्ने सोच थिएन, तर नेपाली चलचित्र प्रतिको लगाबले म चुपचाप दोस्रो चलचित्रको जिम्मेवारी ग्रहण गर्दै छु, पहिलो चलचित्रलाई झैं दोस्रो चलचित्रलाई पनि दर्शकबाट साथ सहयोग र माया पाउने आशा गरेका छौं ।

बुढाले फेसबुक स्टाटस सँगै “मितज्यू” चलचित्रको बारेमा थोरै चित्रण गरिएको जस्तो पेन्टिङ चित्र पनि सार्वजनिक गरेका छन् । चित्रमा ग्रामीण भेगको जस्तो सडक देखिन्छ । सडकमा एउटा जिप रोकिएको छ । रोकिएको जिप सामुन्ने दुई ब्यक्तिले हात मिलाएको जस्तो देखिन्छ ।  जिपको छतमा हिमाली भेगमा पाइने च्याङ्ग्रा, कुखुराको भाले र अन्य घरायसी सामान राखिएको जस्तै देखिन्छ  । जिप पछाडि सेताम्मे हिउँ परेको हिमाल र आधा खुलेको र आधा नखुलेको जस्तो मौसम देखिन्छ  ।

पुष्प आले मगरले तयार पारेको चित्रलाई नियालेर हेर्दा चलचित्रले ग्रामीण भेगको कथा बोकेको जस्तो अनुमान लगाउन सकिन्छ ।

महेश राईको लेखन रहेको चलचित्रलाई जनक घर्ती मगरले निर्देशन गर्न लागेका हुन भने धन बहादुर राइको व्यवस्थापन रहेको छ ।

चलचित्रमा हाललाई कलाकार खुलाईएको छैन । जि एम मुभी प्रोडक्सन ब्यानरमा निर्माण हुन लागेको चलचित्रको प्रदशन मिति २०८२ को चैत्र २७ लाई पक्का गरिएको छ ।