रुकुम पश्चिम -१६, असोज ।

रुकुम पश्चिममा लागु औषध ब्राउन सुगर जस्तो देखिने धुलो सहित एक जना पक्राउ परेका छन् । बिहिबार बेलुकी सानीभेरी गाउँपालिका वडानम्बर -८, सिम्ली नजिकै बाट एकजना व्यक्ति पक्राउ परेका हुन् ।

जिल्ला प्रहरी कार्यालयका प्रहरी निरीक्षक झबिन्द्र परियारका अनुसार मुसिकोट नगरपालिका वडानम्बर -९, का २४ वर्षीय दिपेन्द्र डाँगीलाई पक्राउ गरिएको छ । मध्यपहाडी सडकमा शंकास्पद रूपमा हिँडिरहेका डाँगीलाई शङ्का मानी तलासी गर्दा १ सय ८० मिलिग्राम लागु औषध (ब्राउनसुगर) जस्तो देखिने धुलो पदार्थ फेला परेको बताइएको छ ।

निजले लगाएको पाईन्टको गोजीमा लुकाई छिपाई राखिएको कालो प्लाष्टिकमा प्याक गरी बनाएको पाँचवटा पुरिया प्रहरीले फेला पारेको जनाएको छ ।

प्रहरीले सोही स्थानबाट निज डाँगीलाई पक्राउ गरी सम्मानित रुकुम जिल्ला अदालत मुसिकोट रुकुम (पश्चिम भाग) बाट म्याद थप अनुमति लिई अनुसन्धान भइरहेको बताएको छ ।