रुकुम पश्चिम -२३, साउन ।  

फूल जस्तै, 

हिजो कति प्यारमा थियौ कान्छी

पिपलपाते तिम्रा ओटको मुस्कान

मृग नयनी तिम्रा आँखाका इसारा

झरना झैँ फिजारिएको केश लहरी ।

जून जस्तै,

त्यो पलमा उजेलित मुहार

मह जस्तो मिठो तिम्रो गफ

लजाएर सँगै विताएका याद

त्यो सुनौलो उकाली ओरालीको यात्रा ।

समयको खेला,

हिजो तिमी एक्लै थियौ

म पनि एक्लै थिएँ

स्वतन्त्र थियो गतिशीलता

कति आकर्षण थियो मायावी नजर ।

अमिलो जस्तै,

हिजोको फूल, काँडा किन बन्यौ

मायामा पनि छायाँ देख्यौ

मेरो हेराइलाई पिटाइ ठानेर

मेरो बोली पनि झेली बुझ्यौ कान्छी ।

ऐरेलु जस्तै,  

आज त देखिएन हसिलो मुहार

ऐरेलु चपाए जस्तै किन हो त

के साच्चै ! मलाई बैरी ठान्यौ ?

कति निष्ठुरी बन्दैछ्यौ कान्छी

तिम्रो र मेरो पथ बेग्लै गतिमा छ

तर, तिम्रो व्यवहार आज त अनायासै

बैगुनी शैलीमा सीमित छ कान्छी ।