रुकुम पश्चिम -१७, साउन ।
जिल्ला प्रहरी कार्यालय रुकुम पश्चिमले गत आर्थिक वर्ष २०८२/८३ मा सम्पादित कार्यको प्रगति विवरण आज सार्वजनिक गरेको छ । कार्यालयले अपराध अनुसन्धान तथा नियन्त्रण देखि शान्ति सुरक्षा तर्फका सम्पादित कार्यको प्रगति विवरण सार्वजनिक गरेको हो ।
सार्वजनिक प्रगति विवरण अन्तर्गत गत आर्थिक वर्षमा २ सय २३ वटा मुद्दा दर्ता भएकोमा एकसय २० वटा फर्छ्यौट गरिएको प्रहरी नायव उपरीक्षक बेद बहादुर पौडेलले बताए । प्रहरीले जघन्य तथा गम्भीर अपराध, महिला बालबालिका तथा जेष्ठ नागरिकसँग सम्बन्धित अपराध, आर्थिक अपराध र अन्यतर्फका मुद्दाको विवरण पनि सार्वजनिक गरेको छ ।
त्यस्तै गत आर्थिक वर्षमा ७८ जना फरार प्रतिवादी पक्राउ गरेर एक लाख ६० हजार जरिवाना असुल गरी ६२ वर्ष ८ महिना ४ दिन कैद सजाय असुल गरिएको छ । प्रहरीले चालु मुद्दा तर्फका एकसय ३९ जना प्रतिवादी पनि पक्राउ गरिएको बताएको छ ।
जिल्ला प्रहरी कार्यालयमा लागू औषध बरामद सम्बन्धीका आठवटा मुद्दा दर्ता भई १७ जना पक्राउ परेका छन् ।
त्यसैगरी महिला बालबालिका तथा जेष्ठ नागरिक सेवा केन्द्रतर्फ एक वर्षको अवधिमा एकसय ३९ जना मानिस हराएकोमा तीनजना अझै फेला पर्न बाँकी रहेका छन् । प्रहरी कार्यालयमा घरेलु हिंसा सम्बन्धी र ठाडो उजुरीका मुद्दा पनि दर्ता भएको र ठाडो उजुरीका सबै मुद्दा फर्छ्यौट भएको प्रहरीले बताएको छ ।
गत आर्थिक वर्षमा नदीजन्य पदार्थ ओसारपसारका १७ वटा सवारी साधन नियन्त्रणमा लिएर जरिवाना समेत गरिएको छ ।
जिल्ला प्रहरी कार्यालयले समुदाय तथा विद्यालय केन्द्रित कार्यक्रम, नागरिक सुनुवाई तथा सीमान्तकृत, अल्पसंख्यक र पिछडिएका वर्ग लक्षित कार्यक्रम सञ्चालन गरिएको जनाएको छ ।
यस प्रहरी कार्यालयले आगामी योजना तथा रणनीति अन्तर्गत जिल्लाका ६ वटै स्थानीय तहसँग सहकार्य एवं समन्वय गर्ने भएको छ । उक्त योजना अन्तर्गत मनोचिकित्सक सहितको टोली खटी आत्महत्या न्यूनीकरणको लागि मनोसामाजिक सचेतना कार्यक्रम सञ्चालन गर्ने भएको छ ।
त्यस्तै प्रहरीले लागू औषध उत्पादन, बिक्री वितरण र दुर्व्यसनी नियन्त्रणका लागि सामुदायिक प्रहरी साझेदारी कार्यक्रमलाई प्रभावकारी रुपमा सञ्चालन गर्ने र उक्त कार्यमा संलग्नलाई कानुनी दायरामा ल्याउन प्रभावकारी जनशक्ति परिचालन गर्ने योजना बनाएको छ ।
