मुसिकोट -२९, वैशाख ।
रुकुम पश्चिमको मुसिकोट नगरपालिकामा नगर प्रहरीले अटो चालकमाथि कुटपिट गरेको विषयलाई लिएर आज अटो चालकहरु आन्दोलित भएका छन् । सोमबार विहान करिब ११ देखि १२ बजेको समयमा चेकजाँचमा खटिएका नगर प्रहरीले अटो चालक सन्तोष विकलाई कुटपिट गरेको भन्दै चालकहरू आन्दोलनमा उत्रिएका हुन् ।
अटोचालकहरूले बिहान मुसिकोट नगरपालिका अगाडि अटोसहित करिब एक घण्टा नाराबाजी गर्दै आन्दोलन गरेका हुन् ।
लुम्बिनी प्रदेश ००२००१ ह ०४७६ नम्बरको अटोमा क्षमता भन्दा बढी यात्रु राखिएको भन्दै नगर प्रहरीले रोकेर कारबाही गर्न खोजेको थियो । सोही क्रममा नगर प्रहरी र चालकबिच विवाद उत्पन्न भएको र त्यसपछि चालकलाई ३ जना नगरप्रहरीले कोठामा लगेर हातपात गरेको आरोप लगाइएको छ ।
घटनापछि अटो चालकहरु एकजुट हुँदै विरोधमा उत्रिएका छन् । उनीहरुले नगर प्रहरीको व्यवहार अमानवीय र दुर्व्यवहारपूर्ण रहेको आरोप लगाउँदै दोषीमाथि कारबाही गर्न माग गरेका छन् । आन्दोलनमा उत्रिएका चालकहरुले “चेकजाँचको नाममा कुटपिट स्वीकार्य हुँदैन, नगर प्रहरीको दादागिरी बन्द गर” लगायतका नारा लगाएका छन् ।
आन्दोलनरत चालकहरुले नगरपालिकासँग घटनाको निष्पक्ष छानबिन गर्न, पीडित चालकलाई न्याय दिन तथा भविष्यमा यस्ता घटना दोहोरिन नदिन स्पष्ट कार्यविधि बनाउन माग गरेका छन् । उनीहरुले आफूहरु पनि श्रम गरेर परिवार पाल्ने नागरिक भएकाले सम्मानजनक व्यवहार हुनुपर्ने बताएका छन् ।
