रुकुम पश्चिम -२, वैशाख ।
पश्चिम रुकुम भलिबल प्रशिक्षण केन्द्रले दशौं प्रधानमन्त्री कप (एनभिए) भलिबल लिग खेल्ने भएको छ । नेपाल भलिबल सङ्घको आयोजनामा वैशाख १० गतेदेखि काठमाडौँको त्रिपुरेश्वरमा सुरु हुने प्रतियोगितामा पश्चिम रुकुम भलिबल केन्द्र सहभागी हुन लागेको हो ।
प्रशिक्षण केन्द्रका अध्यक्ष तेज बुढाका अनुसार प्रधानमन्त्री कप (एनभिए) भलिबल लिगमा तीन विदेशी खेलाडी सहित पश्चिम रुकुम भलिबल केन्द्रले पुरुषतर्फको प्रतियोगितामा सहभागिता जनाउनेछ । तर, सहभागी खेलाडीको टुङ्गो लाग्न बाँकी रहेको बताइएको छ ।
प्रतियोगितामा पुरुषतर्फ ८ र महिलातर्फ ६ गरी १४ टोली समावेश हुनेछन् ।
भलिबल इतिहासमा सबैभन्दा बढी पुरस्कार राशि भएको प्रतियोगितामा महिला र पुरुष दुवैतर्फ समान पुरस्कार राखिएको छ ।
विजेताले १० लाख, उपविजेताले ५ लाख र तेस्रो हुने टोलीले २ लाख ५० हजार रुपैयाँ पाउनेछन् ।
