रुकुम पश्चिम -२०, फागुन ।
प्रतिनिधि सभा सदस्य निर्वाचन आउन अब मात्र एक दिन बाँकी छ । निर्वाचनलाई शान्तिपूर्ण र भयरहित वातावरणमा सम्पन्न गराउन सरकारले देशैभर ३ लाख बढी सुरक्षाकर्मी परिचालन गरेको छ ।
निर्वाचन सुरक्षा तथा जोखिम व्यवस्थापन समितिका अनुसार निर्वाचन प्रहरी सहित देशभर ३ लाख ४१ हजार १ सय ११ जना सुरक्षाकर्मी परिचालन गरिएको छ ।
जस अन्तर्गत नेपाली सेनाबाट ७९ हजार ७ सय २७, शसस्त्र प्रहरी बलबाट ३४ हजार ५ सय ७६, नेपाल प्रहरीबाट ७५ हजार ७ सय ९७, राष्ट्रिय अनुसन्धानबाट १ हजार ९ सय २१ र निर्वाचन प्रहरी (म्यादी) बाट १ लाख ४९ हजार ९० जना सुरक्षाकर्मी परिचालन गरिएको छ ।
रुकुम पश्चिममा २ हजार बढी सुरक्षाकर्मी
निर्वाचनलाई लक्षित गरेर रुकुम पश्चिममा २ हजार बढी सुरक्षाकर्मी परिचालन गरिएको छ । सहायक प्रमुख जिल्ला अधिकारी केशवप्रसाद ओलीका अनुसार निर्वाचन प्रहरी सहित २ हजार ६९ सुरक्षाकर्मी परिचालन गरिएको हो ।
निर्वाचनलाई शान्तिपूर्ण वातावरणमा सम्पन्न गराउन जिल्लामा ९ सय ४९ निर्वाचन प्रहरी, ४ सय ७४ नेपाल प्रहरी, १ सय ८४ सशस्त्र प्रहरी र ४ सय ६२ जना नेपाली सेना परिचालन गरिएको छ ।
निर्वाचनका लागि रुकुम पश्चिममा ७६ मतदान स्थल कायम गरिएको छ । जसअन्तर्गत १ सय ४० स्थायी र २ अस्थायी गरी १ सय ४२ मतदान केन्द्र कायम गरिएको छ ।
कुल ७६ मतदान स्थलमध्ये ४३ संवेदनशील, २१ अति संवेदनशील र १२ वटा सामान्य रहेका छन् ।
यसपटकको निर्वाचनमा ८ सय ४६ जना कर्मचारी परिचालन गरिएको छ । जिल्लामा कुल १ लाख ६ हजार ६ सय ६० मतदाता रहेका छन् । जसमध्ये ५४ हजार २ सय ६३ पुरुष मतदाता, ५२ हजार ३ सय ९६ महिला मतदाता र अन्य एकजना रहेको जिल्ला निर्वाचन कार्यालय रुकुम पश्चिमले बताएको छ ।
भोलि हुने निर्वाचनका लागि सबै मतदान केन्द्रमा तयारी पूरा भइसकेको मुख्य निर्वाचन अधिकृतको कार्यालयको भनाइ छ ।
