रुकुम पश्चिम -२२, माघ ।

विश्वकप तयारीको दोस्रो अभ्यास खेलमा नेपालले क्यानडालाई पराजित गरेको छ । भारतको चेन्नई क्रिकेट स्टेडियममा आज भएको खेलमा नेपालले ६ विकेटले क्यानडालाई पराजित गरेको हो ।

टस जितेर ब्याटिङ रोजेको क्यानडाले २० ओभर खेल्दै एकसय ६२ रनको टार्गेट दिएको थियो । जवाफी ब्याटिङमा उत्रिएको नेपालले १८ ओभरमा उक्त लक्ष्य पूरा गरेको हो ।

नेपालको जितका लागि आसिफ शेखले ५८ रन र सन्दिप जोराले ४४ रनको योगदान दिए ।

त्यस अघि नेपालको बलिङतर्फ सन्दीप लामिछानेले चार ओभर खेल्दै १४ रन दिएर दुई विकेट लिन सफल भए । पहिलो अभ्यास खेलमा नेपालले युएईलाई सात विकेटले पराजित गरेको थियो ।

अब नेपालले टि ट्वान्टी विश्व कप आइतबार इंग्ल्याण्ड सँग खेल्ने तालिका रहेको छ ।