रुकुम पश्चिम -१०, माघ ।
देशको पश्चिमी भूभागमा आज सामान्य वर्षा तथा हिमपात भएको छ । हाल पश्चिमी न्यून चापिय प्रणालीको प्रभावले पश्चिम क्षेत्रको हिमाली तथा पहाडी भूभागमा वर्षासँगै हिमपात भएको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार आज सुदूरपश्चिम प्रदेश, कर्णाली प्रदेश, लुम्बिनी प्रदेश, गण्डकी प्रदेश, लगायत लुम्बिनी प्रदेश बागमती प्रदेशको पहाडी तथा हिमाली भू-भागमा साधारणतया बादल लागेको छ ।
तर, सुदूरपश्चिम प्रदेश, कर्णाली प्रदेश, लुम्बिनी प्रदेशका थोरै स्थानहरूमा मेघगर्जन चट्याङ सहित हल्का वर्षा भैरहेको छ । बाँकी भू-भागमा मौसम मुख्यतया सफा रहेको मौसम पूर्वानुमान महाशाखाले बताएको छ ।
त्यस्तै आज बेलुकासम्म सुदूरपश्चिम प्रदेश, कर्णाली प्रदेश, लुम्बिनी प्रदेश, गण्डकी प्रदेशको उच्च पहाडी तथा हिमाली भू-भागमा केही स्थानहरूमा तथा बाँकी उच्च पहाडी तथा हिमाली भू-भागमा थोरै स्थानहरूमा हल्का हिमपात र वर्षाको सम्भावना रहेको छ ।
सुदूरपश्चिम प्रदेश लगायत लुम्बिनी प्रदेश, गण्डकी प्रदेश र कर्णाली प्रदेशको बाँकी पहाडी भू-भागका एक-दुई स्थानमा समेत हल्का बर्षाको सम्भावना रहेको छ ।
आज राती देशका पहाडी तथा हिमाली भू-भागमा साधारणतया बादल लाग्ने तथा बाँकी भू-भागमा आंशिक बादल लाग्नेछ । कोशी प्रदेश, गण्डकी र कर्णाली प्रदेशको उच्च पहाडी तथा हिमाली भू-भागका एक-दुई स्थानमा हल्का हिमपात र वर्षाको सम्भावना रहेको छ ।
