बिरस सुनार 

रुकुम पश्चिम -२७, पुस ।

आगामी फागुन २१ गते हुने प्रतिनिधि सभा सदस्य निर्वाचनमा नेपाली कम्युनिस्ट पार्टीका नेता तथा एकल उम्मेदवार गोपाल शर्मा अनलले रुकुम पश्चिमबाट आफ्नो जित पक्का हुने दाबी गरेका छन् ।

उनले शनिबार मुसिकोटमा आयोजित नेपाली कम्युनिस्ट पार्टीको एकता सन्देश सभामा बोल्दै आफ्नो जित पक्का हुनेमा दाबी गरे । नेता अनलले आफ्नो प्रतिस्पर्धी प्रगतिशील लोकतान्त्रिक पार्टीका नेता जनार्दन शर्मालाई समेत निर्वाचनमा जितेर देखाउन चुनौती दिएका छन् ।

रुकुमेली जनताको विकासका लागि एउटा बलियो नेताको आवश्यकता पर्छ भन्दै हिजोसम्म जनार्दनलाई नेता बनाउन लागेको बताए । तर जनार्दनले आफ्नो विचार र सिद्धान्तलाई तिलाञ्जली दिएर रुकुमेली जनतालाई धोका दिएको उनले आरोप लगाए ।

त्यतिमात्र नभई विगतमा गरिएका सहकार्यलाई स्मरण गर्दै आफूले जनार्दनलाई चार-चार पटक चुनाव जिताउन खेलेको भूमिकाको पनि खुलेर आफ्नो भनाइ राखे । यस्तोबेला हजारौँ कार्यकर्ताले गरेको योगदान एवं रुकुमेली जनताको इच्छा र चाहनालाई बुझ्दै आफ्नो मत जनार्दन शर्मा प्रभाकरले नकाट्नेमा आफु विश्वस्त रहेको बताए । बरु जनार्दनलाई घर फर्कन आग्रह गरेका गरे ।

पार्टी एकता सन्देश सभामा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालको उपस्थिति रहेको थियो ।

दुवै नेताले आज बिहान सेरीगाउँ स्थित सहिद प्रतिष्ठानको हलमा अगुवा कार्यकर्ता भेटमा बोल्दै फागुन २१ को निर्वाचनमा लाग्न निर्देशन दिएका छन् । नेता प्रचण्ड र नेपाल आजै काठमाडौँ फर्केका छन् ।