रुकुम पश्चिम, -०१ असोज 

सरकारले ‘जेनजेड’ युवाको प्रदर्शनका क्रममा ज्यान गुमाएकाहरूको सम्मानमा आज देशभर शोक बिदा दिएको छ ।

भ्रष्टाचारविरुद्ध गत भदौ २३ र २४ गते भएको आन्दोलनको क्रममा कम्तीमा ७२ जना युवाको मृत्यु भएको थियो । उनीहरूको सम्झनामा भदौ ३० गते बसेको अन्तरिम सरकार मन्त्रिपरिषद् बैठकले असोज १ गते राष्ट्रिय शोक मनाउँदै सार्वजनिक बिदा दिने निर्णय गरेको थियो ।

सोही निर्णयअनुसार आज नेपालभरका सरकारी कार्यालय, विदेशस्थित नेपाली दूतावास र नियोगहरू बन्द रहेका छन् । साथै, राष्ट्रिय झण्डा आधा झुकाइएका छन् ।

मृत युवाहरूको मंगलबार पशुपति आर्यघाटमा राष्ट्रिय सम्मानका साथ सामूहिक अन्त्येष्टि गरिएको थियो । केही मृतकको शव भने उनीहरूको गृहजिल्लामा लगेर अन्त्येष्टि गरिएको छ ।