रुकुम पश्चिम -१६, भाद्र ।
म्याराथन धावक दुर्गाराज बुढालाई मुसिकोट नगरपालिकाले नगत सहित सम्मान गरेको छ। आइतबार नगर कार्यपालिकाको कार्यालयमा आयोजित कार्यक्रममा नगरप्रमुख महेन्द्र केसी र उपप्रमुख बिमलकुमार पुनले बुढालाई १५ हजार नगत र प्रमाणपत्र सहित सम्मान गरेका हुन्।
कार्यक्रममा बोल्दै नगरप्रमुख केसीले खेल क्षेत्रमा देखाएको उपलब्धिको प्रशंसा गर्दै बुढालाई हार्दिक बधाई दिएका थिए। उपप्रमुख पुनले पनि निरन्तर प्रगतिका लागि शुभकामना दिएका छन्।
बुढाले भदौ १२ गते राप्ती साहित्य परिषद् जिल्ला शाखा रुकुम पश्चिमले आयोजना गरेको ‘मुसीकोट हेरिटेज रन २०८२’ मा प्रथम स्थान हासिल गरेका थिए। उनले २८ किलोमिटर दूरी १ घण्टा ५२ सेकेन्डमा पूरा गरेका थिए।
मुसिकोट नगरपालिका -७ साँखका दुर्गाराजले पटक-पटक राष्ट्रिय तथा अन्तर्राष्ट्रिय म्याराथन प्रतियोगितामा भाग लिई विजेता समेत बन्दै आएका छन ।
