रुकुम पश्चिम -२६, साउन ।

राप्ती लोकमार्ग अन्तरगत त्रिवेणी गाउँपालिका स्थित झुल्नेटा बजार नजिक पर्ने ढाँरेगैराको सडक भासिदै गइरहेकाले सवारी आवागमणमा समस्या हुने गरेको छ । बर्खायाम सुरु भएसँगै वर्षेनी भासिदै गरेको जोखिमयुक्त सडकका कारण आवागमणमा समस्या हुने गरेको हो ।

दाङ्ग, सल्याण हुँदै रुकुम सम्म जोड्ने मुख्य सडक ढाँरेगैराको जमिन दिनहुँ झर्दा हाल सवारी आवागमनमा अवरोध हुने गरेको स्थानीय बताउँछन् । दुई दशकअघि ट्र्याक खोलिएको यही सडक समस्याका कारण गन्तव्यमा हिँडेका यात्रुले समस्या झेल्नु परेको छ ।

रुकुम प्रवेश गर्ने वित्तिकै राप्ती लोकमार्गको मुख्य सडक खण्डको यस्तो अवस्थाले जनताका जनप्रतिनिधि र सरोकारवाला निकायलाई लज्जित बनाउँदै आएको छ । सडक विस्तार गर्दाको पुरानो ट्रयाकको जमिन केही वर्षअघि नै पूर्णरूपमा भासिएर बगिसकेको छ ।

तर जोखिम मोलेर दिनहुँ सयौं सवारीसाधन यही भासिएको सडकमा ओहोरदोहोर गर्दा सरोकारवाला निकायको ध्यान अझै पुग्न सकेको छैन । यसअघि नै स्थानीय सरकार र सडक डिभिजन कार्यालयको सहमति अनुसार अर्को एक वैकल्पिक मार्गका लागि नयाँ ट्रयाक खोल्ने योजना रहेको थियो । तर उक्त योजना कहाँ पुग्यो कसैलाई थाहा छैन ।

यहाँ स्थित ढाँरेगैराको माटो र भूगोल पटक पटक परिक्षण गरिएको थियो । तर एकसय ५० मिटर भित्र सम्म पनि चट्टान नभेटिएकाले यो क्षेत्र कमजोर रहेको पुष्टि भईसकेको छ । यस सडकको बैकल्पिक मार्ग बाहेक अन्य विकल्प नरहेको बताइन्छ ।