रुकुम पश्चिम -२४, असार ।

मुसिकोटमा आज सुरक्षित वैदेशिक रोजगार सम्बन्धी अन्तरक्रिया कार्यक्रम सम्पन्न गरिएको छ । मुसिकोट नगरपालिकाको आयोजना र सामी परियोजनाको सहयोगमा अन्तरक्रिया तथा अभिमुखीकरण कार्यक्रम सम्पन्न गरिएको हो ।

एकदिने अभिमुखीकरणमा वैदेशिक रोजगार सम्बन्धी बनेका ऐन, कानून तथा कार्यविधि सङ्ग सम्बन्धित रहेर जिल्लाका सरोकारवाला निकायको उपस्थितिमा अन्तरक्रिया गरिएको रोजगार संयोजक मायाश्रीवास्तवको भनाइ छ ।

पछिल्लो समय वैदेशिक रोजगारमा जाने नेपाली युवाले सुरक्षित वैदेशिक रोजगार सम्बन्धी सामान्य कुराको ख्याल नगर्दा मानसिक तथा आर्थिक झमेला व्यहोर्नुपर्ने अवस्था छ । सोही समस्यालाई कम गर्न सुरक्षित वैदेशिक रोजगार सम्बन्धी कानुनी अभ्यास र जानकारी आवश्यक रहेकाले यो कार्यकम आयोजना गरिएको बताइएको छ ।

अन्तरक्रिया कार्यक्रममा सामी परियोजनाले सुरक्षित वैदेशिक रोजगारका क्षेत्रमा गर्दै आइरहेको सेवाका विषयमा जानकारी गराइएको थियो । यस परियोजनाले सूचनामा पहुँच, न्यायमा पहुँच, मनोसामाजिक परामर्श, वित्तीय साक्षरता र सीपयुक्त जनशक्तिको विकासमा काम गर्दै आइरहेको छ ।

यसैगरी अभिमुखीकरण कार्यक्रममा प्रमुख जिल्ला अधिकारी कुलबहादुर जिसीले वैदेशिक रोजगारका समस्या र जिल्ला प्रशासन कार्यालयको भूमिकाका विषयमा प्रस्तुतिकरण राखेका थिए । जसअन्तर्गत वैदेशिक रोजगार ऐन, २०६४ र नियमावली, २०६४ का कानूनी व्यवस्था र विधिका विषयमा छलफल गरिएको थियो ।

मुसिकोट नगरपालिका प्रमुख महेन्द्र केसीको अध्यक्षतामा सम्पन्न कार्यक्रममा जिल्ला समन्वय समितिका प्रमुख देव बहादुर बिकको
प्रमुख आतिथ्यता रहेको थियो । त्यस्तै मुसिकोट नगरपालिका उपप्रमुख बिमल कुमार पुन, प्रमुख जिल्ला अधिकारी कुलबहादुर जिसी, प्रहरी प्रमुख प्रमेश बिष्ट, राष्ट्रिय अनुसन्धान प्रमुख नेव बहादुर राना लगायत जनप्रतिनिधि र सरोकारवाला निकायको उपस्थिति रहेको जनाइएको छ ।