रुकुम पश्चिम -२६, जेठ ।
रुकुम पश्चिमको बराह टाकुरामा जारी तेस्रो रुकुम कप भलिबल प्रतियोगिताको आज अन्तिम दिन उपाधि भिडन्त हुने भएको छ । फाइनल प्रतियोगितामा हाम्रो सरोकार र बौदीकाली बिच उपाधिका लागि भिडन्त हुने भएको छ ।
रुकुम भलिबल प्रशिक्षण केन्द्रका अनुसार फाइनल खेल दिउँसो २ बजे सुरु हुने छ । उपाधि विजेता टिमले पाँच लाख ११ हजार रूपैयाँ पुरस्कार प्राप्त गर्नेछ । त्यस्तै दोस्रो हुनेले दुई लाख ६१ हजार पुरस्कार प्राप्त गर्नेछ ।
आइतबार भएको लिग चरण अन्तिम खेलमा बौदीकालीले हाम्रो सरोकारलाई ३-० को सोझो सेटमा पराजित गरेको थियो । अङ्कतालिकामा हाम्रो सरोकार पहिलो र बौदीकाली दोस्रो हुँदै उपाधिका लागि फाइनलमा भिड्न लागेका हुन् ।
जेठ १८ गते सुरु भएको पालिका स्तरीय पुरुष तथा खुल्ला महिला प्रतियोगितामा पुरुषतर्फ टिम खनाल तेस्रो भएको छ ।
महिलातर्फको खुल्ला भलिबल प्रतियोगितामा भने बाँफिकोट गाउँपालिकाले उपाधि जितेको छ । उसले जनज्योति युवा विकास केन्द्र सिस्ने रुकुम पूर्वलाई फाइनलमा सोझो सेटले पराजित गर्दै उपाधि जितेको हो ।
पुरुषतर्फको आजको फाइनल भिडन्तपछि विजेता र उपविजेता लगायत विधागत तर्फ उत्कृष्ट हुने खेलाडीलाई पुरस्कार, प्रमाणपत्र, मेडल, कप, ट्रफी प्रदान गरिने आयोजकले बताएको छ ।
