रुकुम पश्चिम -९, जेठ ।
रुकुम पश्चिमको मुसिकोट नगरपालिका -४, बोहोरा गाउँमा करेन्ट लागेर एक विद्युत प्राविधिकको मृत्यु भएको छ । मङ्गलबार राति १० बजे नेपाल विद्युत प्राधिकरण, वितरण केन्द्र रुकुम पूर्वमा करार सेवामा कार्यरत २९ वर्षीय खिमबहादुर खड्काको करेन्ट लागेर मृत्यु भएको प्रहरीले जनाएको छ ।
प्रहरीका अनुसार, विद्युत प्रसारण लाइन मर्मत गर्ने क्रममा अचानक करेन्ट लागेर खड्काको मृत्यु भएको छ । करेन्ट लाग्दा उनी पोलमै झुण्डिएको अवस्थामा फेला परेका थिए ।
घटना बारे टेलिफोन मार्फत जानकारी प्राप्त हुनासाथ जिल्ला प्रहरी कार्यालय रुकुम पश्चिमका प्रहरी निरीक्षक ऋषि पाठकको कमाण्डमा ७ जना प्रहरी टोली घटनास्थलमा खटिएको थियो ।
प्रहरीले खड्काको शवलाई परीक्षणका लागि जिल्ला अस्पताल सल्लेमा लगिएको जनाएको छ । घटनाको थप अनुसन्धान भइरहेको जिल्ला प्रहरी कार्यालय रुकुम पश्चिमले जानकारी दिएको छ ।
मृतक खड्का सिस्ने गाउँपालिका -३, रुकुम पुर्वका बासिन्दा हुन् ।
