रुकुम पश्चिम -४, जेठ ।
“स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ तेस्रो रुकुम कप भलिबल प्रतियोगिता जेठ १८ गतेदेखि २५ गतेसम्म मुसिकोट नगरपालिका -१, बराहटाकुरामा आयोजना हुने भएको छ । रुकुम पश्चिम भलिबल प्रशिक्षण केन्द्रले खुल्ला पुरुष पालिका स्तरीय र खुल्ला महिला भलिबल प्रतियोगिता आयोजना गर्न लागेको हो ।
रुकुम भलिबल प्रशिक्षण केन्द्रका अध्यक्ष तेज बुढाका अनुसार प्रतियोगितामा पुरुषतर्फ विजेताले रु ५ लाख ११ हजार, उपविजेताले रु २ लाख ६१ हजार, तेस्रोले रु १ लाख ५१ हजार र सान्त्वना हुनेले पुरस्कार स्वरूप रु १ लाख ११ हजार प्राप्त गर्ने छ ।
त्यस्तै महिलातर्फ विजेतालाई रु १ लाख, उपविजेतालाई रु ७५ हजार, तेस्रो स्थानलाई रु ५० हजार र सान्त्वना हुनेलाई पुरस्कार स्वरूप रु २५ हजार प्रदान गरिनेछ ।
पुरुषतर्फ उत्कृष्ट खेलाडीले रु १० हजार पाउने छन् भने उत्कृष्ट स्पाइकर, सेटर, ब्लकर, डिफेन्डर, सर्भर, इमर्जिङ प्लेयर र प्रत्येक विधाका विजेताले रु ५ हजार प्राप्त गर्नेछन् । महिलातर्फ उत्कृष्ट खेलाडीलाई रु ५ हजार र अन्य विधागत पुरस्कार विजेतालाई रु ३/३ हजार प्रदान गरिनेछ ।
प्रतियोगिता अन्तर्राष्ट्रिय भलिबल महासंघ (FIVB) को नियमानुसार खेलाईने छ । पुरुषतर्फ खेल पालिका स्तरीय हुने र महिलातर्फ खुल्ला रहनेछ । प्रत्येक पालिकाले बढीमा तीन जना राष्ट्रिय वा अन्तर्राष्ट्रिय खेलाडी राख्न पाउनेछ । बसोबासको व्यवस्था सम्बन्धित टोलीले गर्नुपर्नेछ ।
एक टोलीमा अधिकतम १५ जना (खेलाडी, प्रशिक्षक, सहायक प्रशिक्षक, व्यवस्थापक) समावेश हुन सक्नेछ । प्रत्येक पालिकाबाट एउटामात्र टोली सहभागी हुन सक्नेछ र अनिवार्य तीन जना खेलाडी पालिका बाहिरका हुनुपर्नेछ । खेल हेर्न सुरुदेखि सेमिफाइनलसम्म एकसय रुपैयाँ र अन्तिम दिन ३ सय रुपैयाँ टिकट शुल्क लाग्नेछ ।
प्रतियोगिताको अनुमानित खर्च करिब रु ३० लाख ५ हजार हुने जनाइएको छ । पुरस्कार राशि रु १३ लाख ५५ हजार, व्यवस्थापन (प्याराफिट, खेलमैदान आदि) रु ५ लाख, प्रचार-प्रसार रु १ लाख ५० हजार, अफिसियल खर्च रु २ लाख र खेल सामग्री रु ९ लाख खर्च हुनेछ ।
यसैगरी भलिबल खेल नभएको खाली समयमा स्थानीय तथा राष्ट्रिय कलाकारहरूबाट मनोरञ्जन प्रदान गरिने आयोजकले जनाएको छ । रुकुम भलिबल प्रशिक्षण केन्द्रले प्रतियोगिताका सम्बन्धमा आज मुसिकोटमा पत्रकार सम्मेलन आयोजना गरेर जानकारी दिएको हो ।
