रुकुम पश्चिम -१८, वैशाख ।
“स्वास्थ्यका लागि खेलकुद, राष्ट्रका लागि खेलकुद” भन्ने मुल नाराका साथ मुसिकोटमा आजदेखि यू-१६ पालिका स्तरीय क्रिकेट प्रतियोगिता सुरु भएको छ । नेपाल क्रिकेट संघ, रुकुम पश्चिमको आयोजनामा वडानम्बर -६, ट्याखोला खेल मैदानमा प्रतियोगिता सुरु भएको हो ।
प्रतियोगिताको उद्घाटन मुसिकोट नगर प्रमुख महेन्द्र केसीले गरे । पहिलोपटक आयोजना गरिएको पालिका स्तरीय प्रतियोगितामा चारवटा टिमको सहभागिता रहेको आयोजक क्रिकेट सङ्घले बताएको छ ।
प्रतियोगितामा मुसिकोट नगरपालिका, चौरजहारी नगरपालिका, त्रिवेणी गाउँपालिका र सानीभेरी गाउँपालिकाका खेलाडीले सहभागिता जनाएका छन् ।
प्रतियोगिताबाट जिल्ला स्तरीय यू-१६ खेलाडी छनौट समेत गरिने बताइएको छ ।
यस प्रतियोगितामा प्रथम हुने टिमले नगद ३० हजार र द्वितीय हुने टिमले २० हजार रुपैयाँ पुरस्कार प्राप्त गर्नेछन् । यस्तै खेल अवधिभर उत्कृष्ट प्रदर्शन गर्ने उत्कृष्ट एकजना खेलाडीलाई म्यान अफ द सिरिज अन्तर्गत एउटा साइकल पुरस्कार र नगद सहित कप प्रमाणपत्र प्रदान गरिने छ । साथै प्रत्येक विधाका उत्कृष्ट खेलाडीहरूलाई समेत आकर्षक पुरस्कारको व्यवस्था गरिएको छ ।
प्रतियोगिताको सह-आयोजक देव्यानी स्पोर्ट्स, मुसिकोट -१, बागबजार रहेको छ । प्रतियोगितामा सहभागिताका लागि कुनै पनि दर्ता शुल्क लगिएको छैन ।
आयोजकले प्रतियोगिता अवधिभर सहभागी खेलाडीहरूका लागि नास्ताको व्यवस्था गरिएको बताइएको छ ।
