रुकुम पश्चिम -२, वैशाख ।

नयाँ सहर आयोजना कार्यालयले चौरजहारीमा चालु आर्थिक वर्षमा दुईवटा आयोजना निर्माणका काम सम्पन्न गर्दैछ । आर्थिक वर्षको अन्तिमसम्म ल्यान्डफिल जाने बाटोको स्तरोन्नति र चौरजहारी जग्गा विकास आयोजना भित्र पूर्वाधार निर्माणको काम सम्पन्न गर्न लागेको हो ।

नयाँ सहर आयोजनाले दिएको जानकारी अनुसार यस चालु आर्थिक वर्षमा साढे २ करोडमा दुईवटा आयोजनाहरू निर्माणको चरणमा रहेका छन् । जसमध्ये एक करोड ६५ लाखमा वडानम्बर -३, स्थित ल्यान्डफिल्ड जाने बाटो स्तरोन्नति गर्ने रहेको छ । आगामी असार २० गते भित्रै सडक स्तरोन्नतिको काम सक्ने गरी लावाङ न्यू नेपाल जेभी कम्पनीले यसको ठेक्का लिएको छ ।

त्यस्तै कुल बजेट ८७ लाखमा चौरजहारी जग्गा विकास आयोजनाभित्र पूर्वाधार निर्माणबाट बाटो ग्राभल गरिने भएको छ । यसको ठेक्का सन्तोष कौशल एण्ड सहिल जेभी जाजरकोटले लिएको नयाँ सहर आयोजनाले बताएको छ ।

नेपालका दश नमुना सहरमा पर्ने चौरजहारीमा नयाँ सहर आयोजनाले यसै चालु आर्थिक वर्षमा फरफारक हुन बाँकी तीनवटा निर्माणका काम पनि सम्पन्न गरेको छ । जसअनुरूप बसपार्क निर्माण, नगरपालिका भवन र घारीगाउँ-मनकोट-अमला-टाकुरा सडक स्तरोन्नतिको काम सम्पन्न गरिएको बताइएको छ ।