रुकुम पश्चिम -२६, चैत ।
रुकुम पश्चिमको इलाका प्रशासन कार्यालय चौरजहारीबाट एकहजार तीन सय बढी सेवाग्राहीले सेवा लिएका छन् । स्थापनाको एक वर्षमा एकहजार तीन सय २३ जनाले सेवा लिएका हुन् ।
कार्यालय प्रमुख तोषराज केसीका अनुसार नाबालक परिचय पत्र, नागरिकता, दलित, जनजाति र खसआर्य प्रमाणित तथा अन्य सिफारिसका लागि एक हजारभन्दा धेरैले सेवा लिएका छन् ।
जसमध्ये गत वर्षको चैत देखि हालसम्म एकहजार दुईसय १७ जनालाई नागरिकता प्रदान गरिएको छ । त्यस्तै नाबालक परिचयपत्र आठजना, दलित जनजाति र खस आर्य प्रमाणित ८० जना तथा अन्य सिफारिस १८ जनालाई प्रदान गरिएको छ ।
नाबालक परिचयपत्रको हकमा १६ वर्ष भन्दा कम उमेरलाई परिचय पत्र उपलब्ध गराइएको छ । आमा वा बुवा विदेशमा रहेका तथा अध्ययनका लागि नेपाल बाहिर जानेलाई परिचयपत्र दिइएको इलाका प्रशासन कार्यालयले बताएको छ ।
अन्य सिफारिस अन्तर्गत जन्म मिति, नाम, थर, ठेगाना अथवा शैक्षिक प्रमाणपत्रमा त्रुटि भएकालाई सिफारिस दिइएको छ ।
इलाका प्रशासन कार्यालयबाट सुरुवाती चरणदेखि नै नयाँ नागरिकता लगायत अन्य सेवा प्रवाहको काम भइरहे पनि प्रतिलिपि र राष्ट्रिय परिचयपत्रको लागि भने यहाँका सेवाग्राही जिल्ला प्रशासन कार्यालयमा जाने गरेका छन् ।
तर नागरिकतापछि अनिवार्य गरिएको राष्ट्रिय परिचय पत्र पनि आगामी वर्षदेखि इलाका प्रशासनबाटै उपलब्ध गराउन थप पहल भइरहेको कार्यालय प्रमुख केसीले बताए ।
गतवर्षको माघ ८ गते स्थापना गरिएको इलाका प्रशासनले त्यसको ठिक दुई महिनापछि चैत १२ गतेदेखि नियमित सेवा प्रवाहको काम सुरु गरेको थियो ।
विगत एक वर्षदेखि घर दैलो नजिकै इलाका प्रशासन कार्यालयबाट नागरिकता सेवा उपलब्ध हुँदा पालिका भित्रका नागरिक जिल्ला प्रशासनमा जानुपरेको छैन । यसबाट समय र पैसाको बचत भएको सेवाग्राही बताउँछन् ।
