रुकुम पश्चिम -१२, चैत । 

रुकुम पश्चिमको मुसिकोटमा स्वावलम्बन लघुवित्त वित्तीय संस्था लिमिटेडको वित्तीय साक्षरता तथा अन्तरक्रिया कार्यक्रम आज सम्पन्न भएको छ । वित्तीय उपशाखा कार्यालय मुसिकोटको आयोजनामा एक दिने वित्तीय साक्षरता तथा अन्तरक्रिया कार्यक्रम सम्पन्न भएको हो ।

उपशाखा कार्यालय प्रमुख कमला कुमारी चलाउनेका अनुसार मुसिकोट नगरपालिका भित्रका स्वावलम्बन लघुवित्तको केन्द्रमा आबद्ध सदस्यको उपस्थितिमा वित्तीय साक्षरता सहित अन्तरक्रिया गरिएको छ । कार्यक्रममा आर्थिक पहुँच, उद्यमशीलता, सुलभ ऋण, बचत तथा रोजगारीका अवसर सम्बन्धी विषयवस्तुमा छलफल गरिएको छ ।

वित्तीय साक्षरता कार्यक्रमको उद्देश्य र औचित्यमा विशेष अतिथि चन्द्रबहादुर थापाको प्रस्तुतिकरण रहेको थियो । त्यसैगरी कार्यक्रमका प्रमुख अतिथि मुसिकोट नगरपालिका उपमेयर बिमल कुमार पुन मगरले महिला सशक्तिकरण र आर्थिक विकासमा लघुवित्त संस्थाले महत्वपूर्ण योगदान पुर्‍याएको बताए । सोही अनुसार लघुवित्तले प्रदान गर्ने ऋणको महत्व बुझेर साना लघु उद्यममा जोडिएका महिला दिदीबहिनीहरुले आर्थिक अवस्थामा सुधार ल्याउनुपर्नेमा उल्लेख गरेका थिए ।

स्वावलम्बन लघुवित्त वित्तीय संस्थाको उद्घाटन कार्यक्रमको सञ्चालन उपशाखाका गणेश गिरीले गरेका हुन् । उक्त कार्यक्रममा संस्थाका सञ्चालक समिति सदस्य उमा जोशी बोहरा र संस्थाका कार्यकारी अधिकृत नरेन्द्र सिंह बिष्टको विशिष्ट अतिथ्यता रहेको बताइएको छ । यस स्वावलम्बन लघुवित्त वित्तीय संस्थाले महिला उद्यमीहरूलाई लघु व्यवसायका लागि सुलभ ऋण प्रवाह गर्दै आय आर्जनमा जोड्ने गरेको छ ।

आज सम्पन्न वित्तीय साक्षरता कार्यक्रममा मुसिकोट नगरपालिका भित्रका ९१ केन्द्रका ७१ जना महिला सदस्यहरुको उपस्थिति रहेको जनाइएको छ ।