रुकुम पश्चिम -२१, फागुन ।
नेकपा एमाले चौरजहारी नगर कमिटीको आयोजनामा २६ औं यदु स्मृति दिवस मनाइएको छ । यदु स्मृति प्रतिष्ठानको भवन चौरजहारीमा आज यदु स्मृति दिवस मनाइएको हो ।
स्मृति दिवस कार्यक्रममा “शहिदको बलिदानी: हाम्रो जिम्मेवारी” विषयक विद्यालय स्तरीय वक्तृत्वकला प्रतियोगगिता समेत सम्पन्न भएको प्रचार विभाग प्रमुख जीवन खड्काले जानकारी दिए । सो वक्तृत्वकलामा मावि खहरेका कबिता बुढा प्रथम, मावि खोलागाँउका केशव ओली दोस्रो, शितल माविका सुदाम गौतम तेस्रो तथा भ्याली बोर्डिङका दिया लामिछाने र आधारभुत विद्यालयका भावना जैसी सान्त्वना भएका छन् । प्रतियोगितामा प्रथम देखि सान्त्वना स्थान हाँसिल गर्ने विद्यार्थीलाई प्रमाणपत्र तथा पुरस्कार प्रदान गरिएको छ ।
स्मृति दिवस कार्यक्रम एमाले नगर कमिटी अध्यक्ष अतिराम ओलीको अध्यक्षता र केन्द्रीय सल्लाहकार परिषद सदस्य गोबिन्द केसीको प्रमुख आतिथ्यतामा सम्पन्न गरिएको छ ।
स्मृति दिवस कार्यक्रममा बोल्ने वक्ताले यदु गौतम रुकुमेली जनताको मन मुटुमा बस्न सफल भएको र उहाँको विचार कहिल्यै नमर्ने बताएका छन् । यदु गौतमको हत्या २०५५ साल फागुन २१ गते साविक रुकुमको गरायला गाविसमा तत्कालिन नेकपा माओवादीले गरेका थिए ।
