रुकुम पश्चिम -२०, फागुन ।

रुकुम पश्चिमको आठविसकोट नगरपालिकामा उद्योग वाणिज्य सम्वन्धी घुम्ती शिविर सञ्चालन गरिएको छ । उद्योग तथा उपभोक्ता हित संरक्षण कार्यालयको आयोजनामा आजदेखि दुई दिने घुम्ती शिविर सञ्चालन गरिएको हो ।

शिविरमा व्यवासाय दर्ता, नामसारी, पुँजी वृद्धि, ठाउँ सारी र उद्देश्य थप सम्वन्धी सेवा प्रदान गरिने कार्यालय प्रमुख रमेश ओलीको भनाइ छ । यस शिविरमा उद्योग तर्फ तीन लाख भन्दा माथि र वाणिज्य तर्फ दश लाख भन्दा माथिको व्यवासाय दर्ता लगायत अन्य सेवा प्रदानका काम गरिने भएको छ ।

वडानम्बर -९, को राडी बजारमा आज र भोलिसम्म सञ्चालन हुने सो शिविरमा व्यवसाय दर्ता गर्न इच्छुक १४ वटै वडाका सेवाग्राहीले सेवा लिने बताइएको छ । आज देखि सुरु भएको घुम्ती शिविरको उद्घाटन नगरप्रमुख रवि केसीले गर्नुभएको थियो ।

स्थानीय सरकार निर्माण पछि उद्योग तर्फ तीन लाख भन्दा तल र वाणिज्य तर्फ दश लाख भन्दा तलको व्यवसाय स्थानीय तहमै दर्ता हुने गरेका छन् ।