रुकुम पश्चिम -५, फागुन ।
समाजवादी प्रेस संगठन, नेपालको दोस्रो राष्ट्रिय भेला आइतबार सम्पन्न भएको छ । संगठनमा आबद्ध देशैभरका प्रतिनिधिको उपस्थितिमा काठमाडौँ स्थित केएम बैंकेटमा दोस्रो भेला सम्पन्न भएको हो ।
भेलाले संगठनको केही रिक्त पदमा पदपूर्ति गर्दै १० बुँदे घोषणापत्र समेत जारी गरेको सो संगठनले बताएको छ । भेलाबाट संगठनका संस्थापक अध्यक्ष शम्भु श्रेष्ठलाई अध्यक्षमा चयन गरिएको छ । त्यस्तै महासचिवमा रोहित दाहाल, कोषाध्यक्षमा भरतराज पोखरेल र उपाध्यक्ष (लुम्बिनी) हृदय भुसाल चयन भएका छन् ।
यस भेलाले १० बुँदे घोषणा पत्र अन्तर्गत अभिव्यक्ति स्वतन्त्रता, प्रेस स्वतन्त्रता, श्रमजीवी पत्रकारहरूको हकहित तथा सुशासन र पारदर्शिताका विषयमा सरकार र सरोकारवाला निकायहरूसँग महत्वपूर्ण मागहरू राखेको छ ।
त्यस्तै सरकारद्वारा प्रस्तावित सामाजिक सञ्जाल नियमनसम्बन्धी विधेयकलाई प्रेस तथा अभिव्यक्ति स्वतन्त्रतामाथि हस्तक्षेप गर्ने प्रयासको रूपमा व्याख्या गर्दै तत्काल फिर्ता लिनुपर्ने माग गरेको छ । साथै, संसदको हिउँदे अधिवेशन छलेर ल्याइएका अध्यादेशहरू फिर्ता लिनुपर्ने र परिमार्जनसहित संसदमा पेश गर्नुपर्ने संगठनको धारणा सार्वजनिक गरेको छ ।
संगठनका पदाधिकारीहरूले हालै केही व्यक्तिहरूले समाजवादी प्रेस संगठनलाई जबरजस्ती विलय गराउने प्रयास गरेको भन्दै त्यसप्रति आपत्ति जनाउँदै संगठन एकताबद्ध रहेको स्पष्ट गर्दै पत्रकारहरूलाई भ्रामक गतिविधिमा नफस्न अपिल समेत गरेको छ ।
यसैगरी समाजवादी प्रेस संगठनले सञ्चार गृहहरूमा काम गर्ने श्रमजीवी पत्रकारहरूले लामो समयसम्म पनि उचित पारिश्रमिक नपाउने, नियुक्ति पत्र नपाउने र श्रम शोषणमा पर्ने घटनाप्रति गम्भीर ध्यानाकर्षण गरेको छ । साथै, बिना कुनै कारण पत्रकारहरूलाई निष्काशन गर्ने वा वेतलवी विदामा राख्ने गतिविधि अन्त्य गर्नुपर्ने माग गरेको छ ।
भेलाले नयाँ सञ्चार माध्यम न्यू मिडियाका नाममा सञ्चालित सामाजिक सञ्जालका सामग्रीहरूको सत्यता र विश्वसनीयताबारे सतर्क रहन सर्वसाधारणलाई अनुरोध गरेको छ । यस्तै, मूलधारका सञ्चारमाध्यमहरूले सुशासन, विकास र समृद्धिका पक्षमा निर्भीकताका साथ भूमिका निर्वाह गर्नुपर्ने धारणा पनि घोषणापत्रमा उल्लेख गरेको छ ।
संगठनले सञ्चारमाध्यमलाई लैंगिकमैत्री बनाउनुपर्ने र महिला पत्रकारहरूमाथि हुने हिंसाजन्य क्रियाकलाप रोक्न राज्यले ठोस नीति ल्याउनुपर्ने बताएको छ । साथै, प्रेस काउन्सिल, पत्रकार महासंघलगायतका निकायमार्फत प्रदान गरिने पुरस्कार, छात्रवृत्ति, तालिम तथा अन्य अवसरहरू निष्पक्ष र समावेशी ढंगले वितरण गर्नुपर्ने माग पनि गरेको छ ।
त्यस्तै कोभिड -१९, आर्थिक मन्दी जस्ता कारणले साना तथा स्वरोजगारमुखी मिडियाहरू बन्द हुने अवस्थामा पुगेको भन्दै राज्यलाई उचित नीति ल्याउन आग्रह गरेको छ ।
राष्ट्रिय भेलामा एकीकृत समाजवादीका महासचिव घनश्याम भुषाल, उपाध्यक्ष तथा पार्टी प्रचार विभाग प्रमुख प्रकाश ज्वाला, बरिष्ठ उपाध्यक्ष राजेन्द्र प्रसाद पाण्डे, सम्मानित नेता झलनाथ खनाल र प्रमुख अतिथि तथा पार्टी अध्यक्ष माधव कुमार नेपालले मन्तव्य राखेका थिए ।
