रुकुम पश्चिम -३० माघ ।

रुकुम पश्चिमको मुसिकोटमा अनाधिकृत रुपमा सञ्चालनमा रहेका पेट्रोल स्टोर्सको आज अनुगमन गरिएको छ । सदरमुकाम मुसिकोट आसपासका बजार क्षेत्रमा सञ्चालनमा रहेका पेट्रोल तथा डिजेल स्टोर्सको अनुगमन गरिएको हो ।

सहायक प्रमुख जिल्ला अधिकारी बिनोद रेग्मीका अनुसार मुसिकोटका चार वटा पेट्रोल तथा डिजेल बिक्री स्टोर्सको अनुगमन गरिएको छ । जसमध्ये सेरीगाउँबाट बिक्री वितरण भइरहेको प्रकाश बुढा मगरको स्टोर्स, बागबजारको समृद्धि आयल सप्लायर्स खलङ्गाको दाजुभाइ मोटर सप्लायर्स र पातुखोलामा रहेको दिपक पुनको पेट्रोल सप्लायर्स अनुगमन गरिएको प्रशासनले बताएको छ ।

अनुगमन गरिएका पेट्रोल स्टोर्स मध्ये प्रकाश बुढाकोमा दुई सय लिटर पेट्रोल र दुई सय लिटर डिजेल, समृद्धि आयल सप्लायर्समा पाँच सय ५५ लिटर पेट्रोल र ७ सय ५० लिटर डिजेल रहेको पाइएको छ । त्यस्तै दाजुभाइ मोटर पार्ट्स एण्ड सप्लायर्समा तीन सय ४० लिटर पेट्रोल र एकहजार एकसय लिटर डिजेल तथा दिपक पुनकोमा पाँच सय लिटर पेट्रोल र एक हजार ७ सय ७० डिजेल बिक्रीका लागि राखिएको प्रशासनले बताएको छ ।

अनुगमनका क्रममा चार वटै स्टोर्स तथा सप्लायर्सबाट अनाधिकृत रुपमा पेट्रोल तथा डिजेल बिक्री वितरण गरेको पाइएकाले समृद्धि र दाजुभाइ सप्लायर्सलाई जरिवाना समेत गरिएको छ । अन्य दुई ठाउँका विक्रेतालाई भने जरिवाना गरिएको छैन । तर अनुगमन समितिले चारवटै विक्रेता तथा सप्लायर्सलाई तीन दिनको समय दिएर सो पेट्रोल तथा डिजेल व्यवस्थापन गरिसक्न निर्देशन दिएको छ ।

उक्त अनुगमन जिल्ला प्रशासन तथा उद्योग तथा उपभोक्ता हित संरक्षण कार्यालयको अगुवाइमा सम्मिलित अनुगमन टोलीको उपस्थितिमा गरिएको हो ।