रुकुम पश्चिम -४, असोज ।
रुकुम पश्चिमको बाँफिकोट गाउँपालिका -३, स्यार्पु दहमा १६औँ स्यार्पु दह पर्यटन मेला तथा प्रथम स्यार्पु दह युनाइटेड कप -२०८३ आयोजना हुने भएको छ । स्यार्पु दह युनाइटेड युवा क्लब तथा वडा खेलकुद, बाँफिकोट गाउँपालिका -३ को आयोजनामा आगामी असोज ११ गतेदेखि १७ गतेसम्म मेला तथा विभिन्न खेलकुद प्रतियोगिता सञ्चालन हुन लागेको हो ।
मेलामा पुरुष भलिबल, महिला भलिबल, पुरुष ब्याडमिन्टन, पौडी, रस्साकस्सी र घैँटोफोर लगायतका प्रतियोगिता सञ्चालन गरिनेछ । प्रतियोगितामा सहभागी खेलाडी तथा टोलीलाई कप, मेडल र प्रमाणपत्रसहित आकर्षक नगद पुरस्कारको व्यवस्था गरिएको स्यार्पु दह युनाइटेड युवा क्लबका अध्यक्ष आदित्य मल्लले जानकारी दिए ।
मल्लका अनुसार पुरुष भलिबल प्रतियोगिताको विजेताले एकलाख ५ हजार ५ सय ५५ रुपैयाँ, उपविजेताले ७० हजार ५ सय ५५ रुपैयाँ र तृतीय हुने टोलीले ४० हजार ५ सय ५५ रुपैयाँ प्राप्त गर्नेछ । पुरुष भलिबलका लागि टिम दर्ता शुल्क १० हजार रुपैयाँ तोकिएको छ ।
त्यस्तै महिला भलिबलतर्फ प्रथम हुनेले ३० हजार ५ सय ५५ रुपैयाँ, द्वितीयले २२ हजार ५ सय ५५ रुपैयाँ र तृतीयले १५ हजार ५ सय ५५ रुपैयाँ पुरस्कार पाउनेछन् । महिला भलिबलको टिम दर्ता शुल्क ३ हजार रुपैयाँ रहेको आयोजकले जनाएको छ ।
पुरुष ब्याडमिन्टनतर्फ प्रथम, द्वितीय र तृतीय हुने खेलाडीलाई क्रमशः २० हजार, १२ हजार र ६/६ हजार रुपैयाँ पुरस्कारको व्यवस्था गरिएको छ । पौडी, रस्साकस्सी र घैँटोफोर प्रतियोगितामा पनि नगद पुरस्कारको व्यवस्था गरिएको छ ।
आयोजकले प्रतियोगितालाई स्वच्छ वडा स्तरीय खेलकुदका रूपमा सञ्चालन गरिने जनाएको छ । खेलाडी अनिवार्य रूपमा खेल पोशाकमा उपस्थित हुनुपर्ने, परिचय खुल्ने सक्कल प्रमाणपत्र पेश गर्नुपर्ने तथा खेलका क्रममा विवाद उत्पन्न भएमा आयोजक र रेफ्रीको निर्णय अन्तिम हुने नियम राखिएको छ ।
आयोजकका अनुसार टिम दर्ता असोज १० गतेसम्म गर्न सकिनेछ भने खेल असोज ११ गते बिहान १० बजेदेखि सुरु हुनेछ । टिम दर्ता फोन मार्फत पनि गर्न सकिने व्यवस्था गरिएको छ ।
स्यार्पु दह युनाइटेड युवा क्लब तथा वडा खेलकुद, बाँफिकोट -३, रुकुम पश्चिमले जिल्लाका खेलाडी तथा खेलप्रेमीहरूलाई प्रतियोगितामा सहभागी भई मेलालाई सफल बनाउन आग्रह गरेको छ ।
