रुकुम पश्चिम -२२, साउन ।
रुकुम पश्चिमको मुसिकोट नगरपालिका -८, लसुनबारीका स्थानीयले आलु बिक्रीबाट राम्रो आम्दानी गर्दै आइरहेका छन् । करिब ५० घरधुरी रहेको यहाँका किसानले बर्खे आलु उत्पादन तथा बिक्रीबाट राम्रो आम्दानी गरेका हुन् ।
वार्षिक ५ सय क्विन्टल आलु उत्पादन हुने यो गाउँमा आलु बिक्रीबाट १५ लाखसम्म भित्रिने गरेको स्थानीय बताउँछन् । लसुनबारीका प्रत्येक किसानको घरबाट १० देखि १५ क्विन्टलसम्म बर्खे आलु उत्पादन हुने गर्दछ । उक्त आलु बिक्रीबाट प्रति घरले वार्षिक २० देखि ५० हजार सम्मको आम्दानी गर्दै आइरहेको किसान लोकबहादुर बुढाको भनाइ छ ।
प्रति किलोग्राम ३० रुपैयाँका दरले बिक्री हुने यहाँको आलु रुकुम पूर्वको रुकुमकोट तथा जिल्लाका विभिन्न बजार क्षेत्रमा निर्यात हुने गरेको छ । गाउँमै उत्पादन हुने गरेको आलु घर आँगनमै बिक्री हुने भएकोले स्थानीय बासिन्दाले श्रमदान गरेर गाउँसम्मै ट्याक्टर जाने बाटो बनाएका छन् ।
गाउँमै पुगेर व्यापारीले खरिद गरेको आलु ट्याक्टर मार्फत स्थानीय बजार तथा रुकुम पूर्व लगायत अन्य बजार क्षेत्रमा पुग्ने गर्दछ ।
आलु उत्पादनबाट राम्रो आम्दानी हुने भएपछि यहाँका किसान आलु खेतीतर्फ आकर्षित भएको र बिक्रीबाट आएको आम्दानीले घर व्यवहार सञ्चालन गर्न सजिलो भएको किसान चेतन ओलीले बताए ।
त्यस्तै लसुनबारीको गाउँमा लसुन खेती पनि राम्रो हुने गर्दछ । यहाँ वार्षिक ५ सय क्विन्टल लसुन उत्पादन हुने गरेको चन्द्रबहादुर पुनको भनाइ छ । नगदे बाली र अन्य खेतीपातीबाट राम्रो आम्दानी हुन थालेपछि पछिल्लो समय लसुनबारीका किसान नगदे बाली तर्फको व्यावसायिक खेतीमा आकर्षित भएका छन् ।
