रुकुम पश्चिम -१९, साउन ।
मुसिकोट नगरपालिका वडानम्बर -१२, जमारुमा रहेको नेपाल राष्ट्रिय आधारभूत विद्यालयमा अध्ययनरत विपन्न विद्यार्थीलाई शैक्षिक सामग्री स्वरूप आज झोला वितरण गरिएको छ । इन्भेष्टमेन्ट एण्ड फाइनान्स कम्पनी लिमिटेड रुकुम शाखा मार्फत ४५ जना विद्यार्थीलाई झोला वितरण गरिएको हो ।
विद्यार्थीको दैनिक पठनपाठनमा सहजता पुगोस् भनेर संस्थागत सामाजिक उत्तरदायित्व अन्तर्गत झोला वितरण गरिएको शाखा प्रमुख अभरण कुमार यादवले बताए । वित्तीय संस्थाको तर्फबाट कमजोर आर्थिक अवस्था भएका बालबालिकालाई झोला वितरणले बालबालिकाको दैनिक पठनपाठनमा सहयाेग पुग्ने विश्वास गरिएको छ ।
विद्यालय प्राङ्गणमा आयोजित एक विशेष कार्यक्रमकाबीच शाखा प्रमुख यादवले विद्यार्थीलाई झोला हस्तान्तरण गरेका हुन् ।
झोला वितरणमा बोल्दै यादवले प्रारम्भिक तहमा अध्ययनरत बालबालिकाको शैक्षिक आवश्यकतालाई मध्यनजर गर्दै संस्थाले सानो सहयोग गरेको बताएका छन् । उनले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता समेत जनाएका छन् ।
झोला हस्तान्तरण कार्यक्रममा शाखा प्रमुख यादव सहित सहायक कर्मचारी ओमकार सुनार, वडानम्बर -१२, का वडा अध्यक्ष धिरण शेर्पाली, विद्यालय व्यवस्थापन समितिका प्रतिनिधि, शिक्षक, अभिभावक, स्थानीय लगायतको उपस्थिति रहेको थियो ।
वित्तीय संस्थाले ग्रामीण क्षेत्रका विपन्न बालबालिकालाई विद्यालय जान प्रोत्साहन मिल्ने गरी शैक्षिक सामग्री सहयोग गरेको भन्दै विद्यालय परिवारले उक्त संस्थाप्रति धन्यवाद व्यक्त गरेको छ ।
