रुकुम पश्चिम -१८, साउन ।
रुकुम पश्चिममा पैदल यात्रीलाई ठक्कर दिने जिप चालक फरार भएका छन् । आज बिहान आठविसकोट राडीबाट खलङ्गातर्फ आइरहेको जिप मुसिकोट -१३, छिबाङ चौतारामा दुर्घटना हुँदा चालक फरार भएका हुन् ।
जिल्ला प्रहरी कार्यालयका प्रहरी निरीक्षक झबिन्द्र परियारले रा १ ज ८३१ नम्बरको जिप अनियन्त्रित भई पैदल यात्रीलाई ठक्कर दिएर चालक फरार भएको बताए । फरार चालकको नामथर नखुलेको र फरार निजको खोजतलास कार्य भईरहेको बताइएको छ ।
अनियन्त्रित जिपको ठक्करबाट मुसिकोट नगरपालिका वडानम्बर -१३, छिवाङ बस्ने अन्दाजी बर्ष ७२ को बम बहादुर खड्का र निजको नातिनी अन्दाजी बर्ष ५ को आकांक्षा ओली घाइते भएका छन् । घाइते दुवै जनाको अवस्था सामान्य रहेको प्रहरीले बताएको छ । घाइतेलाई जिल्ला स्वास्थ्य कार्यालय सल्लेमा पठाइएको छ ।
दुर्घटनामा परेको जिप सडकदेखि अन्दाजी १० मिटर तल खसेको र जिपमा चालक सहित ५ जना यात्रु सवारलाई केही नभएको पाइएको छ ।
दुर्घटनामा परेको जिपलाई धानखेतबाट सडकसम्म तान्ने काम भइरहेको प्रहरीले जनाएको छ ।
