रुकुम पश्चिम -१५, साउन ।

रुकुम पश्चिममा करिब तीन किलोग्राम अफिम सहित दुई जनालाई प्रहरीले पक्राउ गरेको छ । जिल्लाको आठविसकोट नगरपालिका -४, छोटेबगरबाट शुक्रबार दुईजनालाई पक्राउ गरिएको हो ।

पक्राउ पर्नेमा सोही पालिका -३, स्यालाखदी बस्ने २८ वर्षीय टिकाराम बोहरा र वडानम्बर -२,स्याला बस्ने २० वर्षीय गणेश ओली रहेका छन् । प्रहरीले उनीहरूलाई सडक छेउमा शंकास्पद अवस्थामा हिँडिरहेको बेला रोकी चेकजाँच गर्ने क्रममा अफिम फेला पारेको बताएको छ ।

चेकजाँचका क्रममा टिकाराम बोहराले बोकेको झोलाबाट गणेश ओलीले अचानक खुकुरी निकालेर प्रहरीमाथि आक्रमण गर्ने प्रयास गरेका गरेको प्रहरीले जनाएको छ । सोही बेला प्रहरीमाथि खुकुरी प्रहारको प्रयास गरेपछि प्रहरीले एक राउन्ड हवाई फायर गरेको जनाएको छ ।

दुवै जनालाई नियन्त्रणपछि शरीर तथा झोला खानतलासीका क्रममा करिब तीन किलोग्राम अफिम र दुई थान खुकुरी बरामद गरिएको छ । घटना सम्बन्धमा थप अनुसन्धान भइरहेको प्रहरीले बताएको छ ।