रुकुम पश्चिम -१५, असार ।

रुकुम पश्चिमको त्रिवेणी गाउँपालिकामा सोमबार दलित समुदायका लागि सशक्तिकरण कार्यक्रम सम्पन्न गरिएको छ । सामाजिक विकास कार्यालयको आयोजनामा गाउँपालिकाको सिम्रुतुमा सशक्तिकरण सम्बन्धी एक दिने अभिमुखीकरण कार्यक्रम सम्पन्न गरिएको हो ।

दलित समुदायको सवाल र अधिकारका विषयमा अभिमुखीकरण गरिएको सामाजिक विकास कार्यालयले बताएको छ । उक्त कार्यक्रममा पालिकाका ३० भन्दा बढी दलित समुदायका व्यक्तिहरूको उपस्थिति रहेको थियो ।

कार्यक्रममा त्रिवेणी गाउँपालिका अध्यक्ष तथा प्रमुख अतिथि गणेश कुमार केसीले गाउँपालिका सरकारले दलित समुदायको हितको पक्षमा काम गर्दै आइरहेको बताए । उनले समुदायको मागका आधारमा प्रत्येक वर्ष पालिकाले दलित लक्षित आयआर्जन र सशक्तिकरण तर्फका कार्यक्रम बाँडेर कार्यान्वयनमा लगेको जनाए ।

त्यस्तै जिल्ला समन्वय समितिका उपप्रमुख तथा कार्यक्रमका अध्यक्ष देवबहादुर विकले आम दलित समुदाय आफ्नो अधिकारका लागि लड्नुपर्नेमा जोड दिए । राज्यले दिएका सबै अधिकार प्राप्तिका लागि दलित समुदाय सशक्त भएर अगाडि बढ्नुपर्ने उनको भनाइ थियो ।

कार्यक्रमको सञ्चालन समाजिक विकास कार्यालयका प्रशासकीय अधिकृत ध्रुव बाँठा मगरले गरेका थिए । कार्यालयले सोही कार्यक्रम जिल्लाको आठविसकोट नगरपालिका, बाँफीकोट र सानीभेरी गाउँपालिकामा यसअघि नै सम्पन्न गरिसकेको बताएको छ ।