रुकुम पश्चिम -४, असार ।
रुकुम पश्चिमको त्रिवेणी गाउँपालिकामा चालु आर्थिक वर्ष ८२/८३ मा ९२ वटा सानादेखि ठूला योजना सञ्चालनमा रहेको पाइएको छ । स्थानीय पालिका सँगै संघ र प्रदेश सरकारको समपूरक, विशेष र सशर्त अनुदान अन्तर्गतका योजना सञ्चालनमा रहेका छन् ।
कुल योजना मध्य गाउँपालिकाका ५५ वटा र संघ तथा प्रदेश सरकारका ३७ वटा अनुदान योजना रहेको पालिकाले बताएको छ । चालु वर्षको सुरुदेखि हालसम्म सञ्चालनमा रहेका ३० भन्दा बढी योजना सम्पन्न भइसकेका छन् । बाँकी योजनाहरू निर्माणकै चरणमा रहेका छन् ।
पालिकाका मुख्य योजनामा त्रिवेणी चक्रप, लामाखेत जिवाङ-लामामेला रोल्पा सडक निर्माण, खुरखुरी बाठाकोट पतेरी ढुङ्गेघर सडक र कोराबाङ खोला हुँदै कालापोखरा जोड्ने सडक रहेका छन् । जसअन्तर्गत एक करोड विनियोजित बजेटबाट लामाखेत जिवाङ-लामामेला रोल्पा सडक निर्माणको काम सकिएको छ ।
त्यस्तै १ करोड ७५ लाखमा त्रिवेणी चक्रपथ निर्माण तथा स्तरोन्नति र एक करोड बजेटमा कोराबाङ खोला हुँदै कालापोखरा जोड्ने सडक निर्माणको काम चलिरहेको गाउँपालिकाले बताएको छ । बहुवर्षीय आयोजना अन्तर्गत यही असार मसान्तसम्म निर्माण कार्य सम्पन्न हुने गरी ९ करोड ८७ लाख ८९ हजार ७ सय ५० रुपैयाँमा दश शैयाको आधारभूत अस्पतालको भवन निर्माण सम्पन्न हुँदै छ ।
यसैगरी गाउँपालिकाको योजना मार्फत पालिकाको प्रशासकीय भवन निर्माण, फोहोर महिला व्यवस्थापन, चिस्यान केन्द्र सङ्कलन लगायत वडाका विभिन्न योजना रहेका छन् । पालिकाको विनियोजित बजेटबाट वडाका ग्रामीण कृषि सडक निर्माण, सिँचाइ, खानेपानी, मुहान संरक्षण, विद्यालय भवन निर्माण, सडक स्तरोन्नति तथा शिक्षा, स्वास्थ्य, कृषि र पर्यटन सङ्ग सम्बन्धित योजना रहेको गाउँपालिकाले बताएको छ ।
चालु आर्थिक वर्षका यिनै योजनाले सिङ्गो त्रिवेणी गाउँपालिकाको विकास निर्माणले गति लिँदा पालिकावासीको समृद्धिमा थप टेवा पुग्दै गइरहेको छ ।
